በክልሉ በአርሶ አደሩ ዘንድ የሩዝ ልማትን ለማላመድ የተጀመረው ስራ ውጤት ታይቶበታል

ወላይታ ሶዶ፤ ህዳር 21/2018 (ኢዜአ):- በደቡብ ኢትዮጵያ ክልል በአርሶ አደሩ ዘንድ የሩዝ ልማትን ለማላመድ እየተከናወነ ያለው ተግባር ውጤት ማሳየቱን የክልሉ ግብርና ቢሮ አስታወቀ።

በኢትዮጵያ በግብርናው ዘርፍ የምግብ ሉዓላዊነትን ለማረጋገጥ ከሚከናወኑ ተግባራት መካከል ምርትና ምርታማነትን ከማሳደግ ባለፈ በፊት ያልተለመዱ የሰብል አይነቶችንም በኢንሼቲቭ መልክ አርሶ አደር ዘንድ በማላመድ ከውጭ የሚገቡ ምርቶችን በሀገር ውስጥ ማምረት አንዱ ነው።

 

በምክትል ርዕሰ መስተዳድር ማዕረግ የደቡብ ኢትዮጵያ ክልል ግብርና ቢሮ ኃላፊና የዲላ ክላስተር አስተባባሪ መሪሁን ፍቅሩ (ዶ/ር) ለኢዜአ እንደገለጹት፥ በክልሉ ዘርፉን ለማዘመንና ምርትና ምርታማነትን ለማሳደግ ሰፋፊ ተግባራት በመከናወን ላይ ናቸው።

በክልሉ የአየር ንብረትና ምቹ ሥነ ምህዳር ባላቸው አካባቢዎችና ውሃ ገብ በሆኑ አካባቢዎች የሩዝ ምርት የማላመድ ስራ በስፋት እየተከናወነ ይገኛል።

በተለይም በወላይታ፣ ጎፋና ደቡብ ኦሞ ዞኖች 247 ሄክታር በላይ መሬት ማልማት እንደተቻለና በደቡብ ኦሞ ዞን ከለማው 20 ሄክታር ማሳ ከ400 ኩንታል በላይ ምርት መገኘቱን ጠቁመዋል።

ከበጋ ስንዴ ልማት ጎን ለጎን ሩዝን የማላመድና የማምረት ስራን አጠናክሮ በማስቀጠል የአርሶ አደሩን ተጠቃሚነትና የምግብ ዋስትና ለማረጋገጥ ግብ ተጥሎ እየተሰራ መሆኑን ተናግረዋል።

በክልሉ በሩዝ ልማት ላይ ከተሰማሩ አርሶ አደሮች መካከል የዳሞት ፑላሳ ወረዳው አቶ ታምራት አየለ በመኸር እርሻ የቀረበላቸውን የሩዝ ዘር ለመጀመሪያ ጊዜ መዝራታቸውን ገልጸዋል፡፡

 

በዚህም ከሩብ ሄክታር ማሳቸው ከሰባት ኩንታል በላይ ምርት ማግኘታቸውን ገልጸው በቀጣይም ማሳቸውን አስፍተው በመዝራት የተሻለ ምርት ለማግኘት ማቀዳቸውን ተናግረዋል።

ከሌሎች ምርቶች ጋር ሲነፃፀር የሩዝ ምርት በአጭር ጊዜ የተሻለ ምርት እንደሚሰጥ ከተሰጣቸው ስልጠና ተረድተው ወደ ስራ መግባታቸውን የገለጹት ደግሞ ሌላኛው አርሶ አደር ጌታሁን ላልአጎ ናቸው፡፡

 

ልማቱን ከሌሎች አርሶ አደሮች ጋር በመሆን በኩታ ገጠም እያለሙ እንደሚገኙም ተናግረዋል።

ሩዝ የሚሰጠው የምርት መጠንና በገበያ የተሻለ ዋጋ ያለው ከመሆኑ ባሻገር በምግብ ራሳችንን ስለሚያስችለን በቀጣይ አስፍተን እንሰራለን ብለዋል።

 

ሩዝ በሄክታር እስከ 80 ኩንታል ምርት እንደሚሰጥና አርሶ አደሮች በምግብ ራሳቸውን ከመቻል አልፈው ገበያን ለማረጋጋት እንዲችሉ ለማድረግ ታቅዶ እየተሰራበት መሆኑን የክልሉ ግብርና ቢሮ መረጃ ያሳያል።