ኢትዮጵያ ከ17 ዓመት በታች የአፍሪካ ዋንጫ ለማለፍ የሚያስችላትን ወሳኝ ጨዋታ ከዩጋንዳ ጋር ታደርጋለች

አዲስ አበባ፤ ሕዳር 21/2018 (ኢዜአ)፦ የኢትዮጵያ ከ17 ዓመት በታች ብሄራዊ ቡድን በአፍሪካ ዋንጫ የሴካፋ ማጣሪያ ከዩጋንዳ አቻው ጋር የግማሽ ፍጻሜ ጨዋታዋን ዛሬ ያደርጋል። 

የሁለቱ ሀገራት ጨዋታ በአበበ ቢቂላ መታሰቢያ  ስታዲየም ከቀኑ 9 ሰዓት ላይ ይካሄዳል።

አዘጋጇ ኢትዮጵያ በምድብ አንድ በ10 ነጥብ መሪ ሆና ማጠናቀቋ ይታወቃል።

በአሜሪካዊው አሰልጣኝ ቤንጃሚን ዚመር የሚመራው ታዳጊ ብሄራዊ ቡድን በምድቡ ባደረጋቸው አራት ጨዋታዎች ሶስቱን ሲያሸንፍ አንድ ጊዜ አቻ ወጥቷል።

ቡድኑ በጨዋታዎቹ 10 ግቦችን ሲያስቆጥር 4 ጎሎችን አስተናግዷል።ሰባት ግቦችን ከመረብ ላይ ያሳረፈው ዳዊት ካሳው የውድድሩ ከፍተኛ ግብ አስቆጣሪ ነው።

 

ተጋጣሚዋ ዩጋንዳ በምድብ ሁለት በዘጠኝ ነጥብ ሁለተኛ ደረጃን ይዛ አጠናቃለች።

በብሪያን ሴንዮንዶ የምትመራው ዩጋንዳ በምድቡ ባካሄደቻቸው አራት ጨዋታዎች ሶስቱን ስታሸንፍ አንድ ጊዜ ተሸንፋለች።

በጨዋታዎቹ ላይ 20 ግቦችን ስታስቆጥር ሁለት ጎሎችን አስተናግዳለች።

ኢትዮጵያ ዩጋንዳን ካሸነፈች ለፍጻሜ ከማለፍ ባሸገር እ.አ.አ በ2026 በሞሮኮ አስተናጋጅነት እየተካሄደ የሚገኘው 16ኛው ከ17 ዓመት በታች የአፍሪካ ዋንጫ ማለፏን ታረጋግጣለች።

ኢትዮጵያ በጨዋታው ብትሸነፍ፤  በደረጃው  ጨዋታ አሸንፋ ሶስተኛ ከወጣች ለአፍሪካ ዋንጫው ታልፋለች።

ኢትዮጵያ ለመጨረሻ ጊዜ በውድድሩ ላይ የተሳተፈችው እ.አ.አ በ1997 ቦትስዋና ባዘጋጀችው ውድድር ላይ ነበር።

በሌላኛው የግማሽ ፍጻሜ መርሃ ግብር ታንዛንያ ከኬንያ ከቀኑ 6 ሰዓት ላይ በአበበ ቢቂላ መታሰቢያ ስታዲየም ይጫወታሉ።

ታንዛንያ በምድብ ሁለት በ12 ነጥብ አንደኛ ደረጃን ይዛ አጠናቃለች። በምድቡ ባደረገቻቸው አራት ጨዋታዎች 19 ግቦችን ስታስቆጥር የተቆጠረባት አንድ ግብ ብቻ ነው።

ተጋጣሚዋ ኬንያ በምድብ ሁለት በሰባት ነጥብ ሁለተኛ ደረጃን ይዛ አጠናቃለች።

በምድቡ አራት ጨዋታዎችን አድርጋ ሁለቱን ስታሸንፍ አንድ ጊዜ ተሸንፋለች።

በቀሪው አንድ ጨዋታ አቻ ተለያይታለች። አምስት ግቦችን ስታስቆጥር ሶስት ግቦችን አስተናግዳለች።

የግማሽ ፍጻሜ አሸናፊዎቹ ሕዳር 23 ቀን 2018 ዓ.ም ለሚደረገው የፍጻሜ ጨዋታ ያልፋሉ።

በውድድሩ ላይ ከአንደኛ እስከ ሶስተኛ የሚወጡ ሀገራት የሴካፋ ዞንን ወክለው እ.አ.አ በ2026 በሞሮኮ አስተናጋጅነት በሚካሄደው 16ኛው ከ17 ዓመት በታች የአፍሪካ ዋንጫ ላይ ይሳተፋሉ።