የኢትዮጵያ ፕሪሚየር ሊግ ስምንተኛ ሳምንት ዛሬ ይጀመራል 

አዲስ አበባ፤ ሕዳር 21/2018 (ኢዜአ)፦ በኢትዮጵያ ፕሪሚየር ሊግ ስምንተኛ ሳምንት የመጀመሪያ ቀን ውሎ አራት ጨዋታዎች ይደረጋሉ። 

የዕለቱ የመጀመሪያ ጨዋታ ፋሲል ከነማ እና ወላይታ ድቻን ከቀኑ 7 ሰዓት ላይ በአዲስ አበባ ስታዲየም ያገናኛል።

ፋሲል ከነማ በሊጉ ባደረጋቸው ሰባት ጨዋታዎች አራቱን ሲያሸንፍ በሶስቱ አቻ ወጥቷል።

በጨዋታዎቹ ላይ ስድስት ግቦችን ሲያስቆጥር የተቆጠረበት አንድ ግብ ብቻ ነው። ቡድኑ በ15 ነጥብ ሁለተኛ ደረጃን ይዟል።

ተጋጣሚው ወላይታ ድቻ በውድድር ዓመቱ ካደረጋቸው ሰባት ጨዋታዎች መካከል ማሸነፍ የቻለው አንድ ጊዜ ብቻ ነው። በአራቱ ሽንፈት ሲያስተናግድ ሁለት ጊዜ ነጥብ ተጋርቷል። ስድስት ግቦች ከመረብ ላይ ሲያሳርፍ 10 ጎሎችን አስተናግዷል።

ወላይታ ድቻ በአምስት ነጥብ 17ኛ ደረጃን ይዞ ወራጅ ቀጠና ውስጥ ይገኛል። 

ፋሲል ከነማ ጨዋታውን ካሸነፈ የሊጉን መሪነት ከሲዳማ ቡና ይረከባል። በአንጻሩ ወላይታ ድቻ ድል ከቀናው ከወራጅ ቀጠና ይወጣል።

በሌላኛው መርሃ ግብር ወልዋሎ አዲግራት ዩኒቨርሲቲ ከመቀሌ 70 እንደርታ ከቀኑ 10 ሰዓት ላይ በአዲስ አበባ ስታዲየም ይጫወታሉ። 

 

ወልዋሎ አዲግራት ዩኒቨርሲቲ በሊጉ እስከ አሁን ምንም ድል አላስመዘገበም። ስድስት ጊዜ ሲሸነፍ አንድ ጊዜ ተሸንፏል። ሶስት ግቦችን ከመረብ ላይ ሲያሳርፍ 13 ጎሎች ተቆጥረውበታል። ቡድኑ በአንድ ነጥብ የመጨረሻውን 20ኛ ደረጃ ይዟል። 

ተጋጣሚው መቀሌ 70 እንደርታም በሊጉ እስከ አሁን ያሸነፈው ጨዋታ የለም። ሶስት ጊዜ ሽንፈት ሲገጥመው በቀሪ ሶስት ጨዋታዎች አቻ ወጥቷል። ስምንት ግቦችን በሰባቱ ጨዋታዎች ሲያስቆጥር 12 ጎሎችን አስተናግዷል።

መቀሌ 70 እንደርታ በአራት ነጥብ 18ኛ ደረጃን ይዞ ወራጅ ቀጠና ውስጥ ይገኛል።

ሁለቱ ክለቦች የመጀመሪያ ሶስት ነጥባቸውን ለማግኘት ይጫወታሉ።

ባህር ዳር ከተማ ከኢትዮጵያ መድን በሃዋሳ ዩኒቨርሲቲ ስታዲየም  ከቀኑ 9 ሰዓት ላይ ጨዋታቸውን ያደርጋሉ። 

በሊጉ ካደረጋቸው ሰባት ጨዋታዎች መካከል ሁለቱን ያሸነፈው ባህር ዳር ከተማ በተመሳሳይ ሁለት ጊዜ ሽንፈት አጋጥሞታል። ሶስት ጊዜ ደግሞ ነጥብ ተጋርቷል። በጨዋታዎቹ ሰባት ግቦችን ሲያገባ ስድስት ጎሎችን አስተናግዷል። 

ባህር ዳር ከተማ በዘጠኝ ነጥብ ዘጠነኛ ደረጃን ይዟል። 

የወቅቱ የሊጉ አሸናፊ ኢትዮጵያ መድን በውድድር ዓመቱ ስድስት ጨዋታዎችን አድርጎ ሁለት ጊዜ ሲያሸንፍ በተመሳሳይ ሁለት ጊዜ ሽንፈት አጋጥሞታል። በቀሪ ሁለት ጨዋታዎች አቻ ተለያይቷል። አምስት ግቦችን ሲያስቆጥር በተመሳሳይ አምስት ጎሎችን አስተናግዷል። 

መድን ቀሪ አንድ ተስተካካይ ጨዋታ እየቀረው በስምንት ነጥብ 13ኛ ደረጃ ላይ ተቀምጧል።

ምሽት 12 ሰዓት ላይ ኢትዮ ኤሌክትሪክ ከአዳማ ከተማ  በሃዋሳ ዩኒቨርሲቲ ስታዲየም ይጫወታሉ።

ኢትዮ ኤሌክትሪክ በሊጉ ካካሄዳቸው ሰባት ጨዋታዎች መካከል አራቱን ሲያሸንፍ በአንዱ ሽንፈት አስተናግዷል። ሁለት ጊዜ ደግሞ አቻ ወጥቷል። በጨዋታዎቹ ስድስት ግቦችን ሲያስቆጥር ሶስት ጎሎችን አስተናግዷል። ቡድኑ በ14 ነጥብ ሶስተኛ ደረጃን ይዟል።

ተጋጣሚው አዳማ ከተማ በበኩሉ ከሰቤት ጨዋታዎች ሶስቱን ሲያሸንፍ አንድ ጊዜ ተሸንፏል። በሶስት ጨዋታዎች ነጥብ ጥሏል። በእነዚህ ጨዋታዎች ላይ አራት ግቦችን ሲያስቆጥር ሁለት ግቦች ተቆጥረውበታል።

አዳማ ከተማ በ12 ነጥብ ሰባተኛ ደረጃ ላይ ይገኛል። 

የስምንተኛ ሳምንት መርሃ ግብር እስከ ሕዳር 23 ቀን 2018 ዓ.ም ይቆያል። 

ሲዳማ ቡና ሊጉን በ16 ነጥብ እየመራ ነው።

ወላይታ ድቻ፣ መቀሌ 70 እንደርታ፣ አርባምንጭ ከተማ እና ወልዋሎ አዲግራት ዩኒቨርሲቲ ከ17ኛ እስከ 20ኛ ያለውን ደረጃ በመያዝ ወራጅ ቀጠና ውስጥ ይገኛሉ።