በሴቶች ፕሪሚየር ሊግ ኢትዮጵያ ንግድ ባንክ ከባህር ዳር ከተማ ጋር ይጫወታል 

አዲስ አበባ፤ ሕዳር 21/2018 (ኢዜአ)፦  የኢትዮጵያ ሴቶች ፕሪሚየር ሊግ ዘጠነኛ ሳምንት ዛሬ በሚደረጉ ጨዋታዎች ይጠናቀቃል።

ከቀኑ 9 ሰዓት የወቅቱ የሊጉ አሸናፊ ኢትዮጵያ ንግድ ባንክ ከባህር ዳር ከተማ በኢትዮጵያ ንግድ ባንክ ሜዳ ጨዋታቸውን ያደርጋሉ።

ኢትዮጵያ ንግድ ባንክ በሊጉ ባደረጋቸው ስድስት ጨዋታዎች አምስቱን ሲያሸንፍ አንድ ጊዜ አቻ ወጥቷል። በጨዋታዎቹ ላይ 20 ግቦችን ሲያስቆጥር አንድ ግብ አስተናግዷል። 

ንግድ ባንክ ሁለት ተስተካካይ ጨዋታ እየቀረው በ16 ነጥብ ሶስተኛ ደረጃን ይዟል። 

ተጋጣሚው ባህር ዳር ከተማ በሊጉ ካከናወናቸው ስምንት ጨዋታዎች መካከል ያሸነፈው አንዱን ብቻ ነው። ስድስት ጊዜ ሲሸነፍ በቀሪው አንድ ጨዋታ ነጥብ ተጋርቷል። አራት ግቦችን ከመረብ ላይ ሲያሳርፍ 10 ጎሎች ተቆጥረውበታል።

ባህር ዳር ከተማ በአራት ነጥብ 13ኛ ደረጃን ይዞ ወራጅ ቀጠና ውስጥ ይገኛል። 

በሌላኛው መርሃ ግብር ከረፋዱ አራት ሰዓት ላይ አዳማ ከተማ ከመቻል በኢትዮጵያ ንግድ ባንክ ሜዳ ይጫወታሉ። 
አዳማ ከተማ እስከ አሁን በሊጉ ባካሄዳቸው ስምንት ጨዋታዎች ሶስቱን ሲያሸንፍ በአራቱ ተሸንፏል። በቀሪ አንድ ጨዋታ አቻ ተለያይቷል። ስድስት ግቦችን በነዚህ ጨዋታዎች ላይ ሲያገናኝ 15 ጎሎች ተቆጥረውበታል።

ቡድኑ በ10 ነጥብ ዘጠነኛ ደረጃን ይዟል።

በውድድር ዓመቱ ካደረጋቸው ስምንት ጨዋታዎች መካከል አራቱን ያሸነፈው መቻል በሁለት ጨዋታዎች ሽንፈት አስተናግዷል። ሁለት ጊዜ ደግሞ ነጥብ ተጋርቷል። 11 ግቦችን ከመረብ ላይ ሲያሳርፍ ሰባት ጎሎችን አስተናግዷል።

መቻል በ14 ነጥብ አራተኛ ደረጃን ይዟል።

ከቀኑ 7 ሰዓት ላይ ቦሌ ክፍለ ከተማ ከአዲስ አበባ ከተማ ጨዋታቸውን ያከናውናሉ።

ቦሌ ክፍለ ከተማ በሊጉ ባደረጋቸው ስምንት ጨዋታዎች ሶስቱን ሲያሸንፍ በሁለቱ ተሸንፏል። ሶስት ጊዜ ደግሞ አቻ ተለያይቷል። በጨዋታዎቹ ላይ ስምንት ግቦችን ሲያስቆጥር በተመሳሳይ ስምንት ጎሎችን አስተናግዷል። 

ቡድኑ በ12 ነጥብ ስድስተኛ ደረጃ ላይ ይገኛል። 

ተጋጣሚው አዲስ አበባ ከተማ በበኩሉ ከስምንት የሊግ ጨዋታዎች ማሸነፍ የቻለው አንድ ጊዜ ብቻ ነው። በቀሪ ሰባት ጨዋታዎች ተሸንፏል። ሶስት ግቦችን ከመረብ ላይ ሲያሳርፍ 16 ግቦች ተቆጥረውበታል።

አዲስ አበባ ከተማ በሶስት ነጥብ የመጨረሻውን 14ኛ ደረጃን ይዟል።