ቼልሲ እና አርሰናል ዛሬ የሚያደርጉት የሊግ ጨዋታ ይጠበቃል

አዲስ አበባ፤ ሕዳር 21/2018 (ኢዜአ)፡- በእንግሊዝ ፕሪሚየር ሊግ የ13ኛ ሳምንት መርሐ ግብር ቼልሲ እና አርሰናል የሚያከናውኑት ጨዋታ የእግር ኳስ ቤተሰቡን ትኩረት ስቧል።

ጨዋታው ምሽት 1 ሰዓት ከ30 ላይ በስታምፎርድ ብሪጅ ስታዲየም ይካሄዳል። 

ቼልሲ በውድድር ዓመቱ ባደረጋቸው 12 ጨዋታዎች 7 ጊዜ ሲያሸንፍ 2 ጊዜ ተሸንፎ በ3 ጨዋታዎች ነጥብ ተጋርቷል።

ሰማያዊዎቹ በጨዋታዎቹ 23 ግቦቹን ሲያስቆጥሩ 11 ጎሎችን አስተናግደዋል። 

በ45 ዓመቱ ጣልያናዊ ኤንዞ ማሬስካ የሚመራው ቼልሲ በ23 ነጥብ 3ኛ ደረጃን ይዟል።

ተጋጣሚው አርሰናል በሊጉ ካካሄዳቸው 12 ጨዋታዎች መካከል 9 ጊዜ ሲያሸንፍ 1 ጊዜ ሽንፈት አስተናግዷል። በቀሪ ሁለት ጨዋታዎች አቻ ተለያይቷል። 

መድፈኞቹ በጨዋታዎቹ 24 ጎሎችን ከመረብ ላይ ሲያሳርፉ 6 ግቦች ተቆጥሮባቸዋል። 

በ43 ዓመቱ ስፔናዊ ማይክል አርቴታ የሚሰለጥነው አርሰናል በ29 ነጥብ የሊጉ አናት ላይ ተቀምጧል።

ሁለቱ ክለቦች በሁሉም ውድድሮች ሲገናኙ የዛሬው ለ212ኛ ጊዜ ነው። 

ከዚህ ቀደም በነበራቸው 211 የእርስ በእርስ ግንኙነቶች አርሰናል 84 ጊዜ በማሸነፍ የበላይነቱን ይዟል። ቼልሲ በ66ቱ አሸንፎ በ61 ጨዋታዎች ደግሞ አቻ ወጥተዋል።

በእንግሊዝ ፕሪሚየር ሊግ ባደረጓቸው 66 ጨዋታዎች አርሰናል 27 ጊዜ ሲያሸንፍ ቼልሲ 20 ጊዜ አሸንፏል። 19 ጊዜ ደግሞ አቻ ተለያይተዋል።

ክለቦቹ ባደረጓቸው ያለፉት 10 የሊግ ጨዋታዎች መካከል አርሰናል ሰባቱን በማሸነፍ የበላይነቱን ይዟል። ቼልሲ አንድ ጊዜ ሲያኘንፍ ሁለት ጊዜ አቻ ተለያይተዋል። 

አርሰናል እና ቼልሲ በለንደን ከተማ የሚገኙ ታሪካዊ ተቀናቃኝ ቡድኖች ናቸው። ለ118 ዓመታት የዘለቀ ፉክክር አድርገዋል። 

አርሰናል የሊጉን ዋንጫ 13 ጊዜ ሲያነሳ ቼልሲ 6 ጊዜ የዋንጫው ባለቤት ሆኗል።

የከተማ ተቀናቃኞቹ የሚያደርጉት ጨዋታ አዝናኝ ፉክክር ይታይበታል ተብሎ ይጠበቃል። ጨዋታው በዋንጫ ፉክክሩ ላይ የራሱ ተጽእኖ ያለው ነው። 

የ47 ዓመቱ አንቶኒ ቴይለር ተጠባቂውን ጨዋታ በዋና ዳኝነት ይመሩታል።

በሌሎች መርሃ ግብሮች ክሪስታል ፓላስ ከማንችስተር ዩናይትድ ከቀኑ 9 ሰዓት ይጫወታሉ።

ዌስትሃም ዩናይትድ ከሊቨርፑል፣ አስቶንቪላ ከዎልቭስ እና ኖቲንግሃም ፎረስት ከብራይተን በተመሳሳይ ከቀኑ 11 ሰዓት ከ5 ላይ ጨዋታቸውን ያደርጋሉ።