የሀገር እድገት ከልካይ የሆኑ አጥሮችን መስበር ካልተቻለ ሀገራዊ እድገት ማምጣት አይቻልም - ጠቅላይ ሚኒስትር ዐቢይ አሕመድ (ዶ/ር)

አዲስ አበባ፤ ህዳር 20/2018(ኢዜአ)፦ የሀገር እድገት ከልካይ የሆኑ አካላዊ፣ ተቋማዊ ወይም ስርዓታዊ እንዲሁም ባህላዊ አጥሮችን መስበር ካልተቻለ ዕድገት ማምጣት አይቻልም ሲሉ ጠቅላይ ሚኒስትር ዐቢይ አሕመድ (ዶ/ር) ገለጹ፡፡

ጠቅላይ ሚኒስትር ዐቢይ አሕመድ(ዶ/ር) በብልጽግና ፓርቲ የከፍተኛ አመራሮች ስልጠና ማጠቃለያ ላይ “በመደመር መንግሥት ዕይታ፣ የዘርፎች እመርታ” በሚል መሪ ሀሳብ በመደመር መንግሥት እሳቤዎች ዙሪያ ማብራሪያ ሰጥተዋል፡፡

በማብራሪያቸውም የሀገር እድገት ከልካይ የሆኑ አካላዊ፣ ተቋማዊ ወይም ስርዓታዊ እንዲሁም ባህላዊ አጥሮችን መስበር ካልተቻለ ዕድገት ማምጣት አይቻልም ነው ያሉት።

አዲስ አበባ ከተማ እነዚህን አጥሮች መስበሩን በአብነት አንስተው በዚህም እውቀትና ገንዘብ ያለው እንዲሁም ኢንቨስት ለማድረግ የሚፈልግ ሰው መጠቀም የሚችልበት ዐውድ መፈጠሩን ተናግረዋል፡፡

ክልሎች መሰል አጥሮችን በመስበር እውቀትና ገንዘብ ያላቸውን ሰዎች መሳብ ካልቻሉ በአዲስ አበባ የተገኘውን እድገት ማሳካት እንደሚቸግራቸውም አስገንዝበዋል፡፡

ጠቅላይ ሚኒስትር ዐቢይ አሕመድ(ዶ/ር) ስለኢነርጂ ሀብትና የማምረት አቅምን በተመለከተ በሰጡት ማብራሪያም ኢትዮጵያ ካላት እምቅ የኢነርጂ አቅም የተጠቀመችው ውስን ብቻ መሆኑን ገልጸዋል።

ኢነርጂን በብዛት ማምረት ለኢንዱስትሪ፣ ለግብርና፣ ለከተሜነት እና ለቴክኖሎጂ ግብዓት መፍጠር መሆኑንም አያይዘው ተናግረዋል።

 

የኢትዮጵያን የኢነርጂ እምቅ ሀብት እና የማምረት አቅም ባነሱበት ማብራሪያቸውም አፍሪካ ውስጥ ከሚገኙ አስራ አምስት ትላልቅ ግድቦች መካከል አራቱ በኢትዮጵያ እንደሚገኙ ገልጸዋል።

እነርሱም በ11ኛ ደረጃ ላይ የሚገኘው ተከዜ፣ 7ኛ ደረጃ ላይ የሚገኘው ጊቤ፣ 2ኛ ደረጃ ላይ የተቀመጠውን ኮይሻ እእንዲሁም በ1ኛ ደረጃ ላይ የሚገኘውን ታላቁ የኢትዮጵያ ሕዳሴ ግድብን በማሳያነት አንስተዋል።

በአፍሪካ ከሚገኙ 15 ትላልቅ የሀይል ማመንጫ ግድቦች መካከል በቁጥር አራቱ በኢትዮጵያ ቢገኙም ኢትዮጵያ  ካላት የማምረት አቅም ጋር ሲነፃፀር ብዙ መሰራት እንደሚገባ ያሳያል ነው ያሉት።

 

መሰልጠንን በተመለከተ በሰጡት ማብራሪያም አባይ ታሪክ ነው፤ ንጋት ግን ታሪክ በመስራት የተገኘ ድል በመሆኑ ሥልጣኔ መሆኑን ገልጸዋል።

እንደንጋት አይነት ስራዎችን ደጋግመን ከሰራን ሥልጣኔን መጎናጸፍ፣ ማቆየትና ማሸጋገር እንደሚቻል አስገንዝበዋል፡፡

በሥልጣኔ ጎዳና የመደመር ሚና ስብራትን መጠገን፣ መሰረት መጣል እና ሥልጣኔን ማስቀጠል የሚያስችል አቅጣጫን መቀየስ እነደሆነ ጠቁመው እነዚህን ሂደቶች ተግባራዊ ለማድረግ መነሻው ሀሳብ መሆኑን አጽንኦት ሰጥተዋል።

የመደመር እሳቤ ለሥልጣኔያችን ዘር ሆኖ የሚያገለግል ነው ያሉት ጠቅላይ ሚኒስትር ዐቢይ አሕመድ(ዶ/ር) ይህ እሳቤ ካለፈው ተምረንና የሚስተካከለውን አርመን፣ በዛሬው ተጠቅመንና ተመስርተን የነገውን የምንረዳበት መነጽር፣ የማይጠፋና የማይሞት ዘር መሆኑንም አስገንዝበዋል።