ኢነርጂን በብዛት መፍጠር ለኢንዱስትሪ፣ ለግብርና እና ለቴክኖሎጂ ግብዓት እንደመፍጠር ይቆጠራል - ጠቅላይ ሚኒስትር ዐቢይ አሕመድ (ዶ/ር)

አዲስ አበባ፤ ሕዳር 20/2018(ኢዜአ)፦ ኢነርጂን በብዛት መፍጠር ለኢንዱስትሪ፣ ለግብርና፣ ለከተሜነት (ለስልጣኔ) እና ለቴክኖሎጂ ግብዓት እንደመፍጠር ይቆጠራል ሲሉ ጠቅላይ ሚኒስትር ዐቢይ አሕመድ(ዶ/ር) ገለፁ።

ጠቅላይ ሚኒስትር ዐቢይ አሕመድ(ዶ/ር) “በመደመር መንግሥት እይታ፣ የዘርፎች እመርታ” በሚል ለብልፅግና ከፍተኛ አመራሮች ሲሰጥ በነበረው ስልጠና ላይ የማጠቃለያ ሀሳብ አቅርበዋል።

ጠቅላይ ሚኒስትር ዐቢይ ባቀረቡት የማጠቃለያ ሀሳብ፣ ኢትዮጵያ ካላት እምቅ የኢነርጂ አቅም የተጠቀመችው ውስኑን ብቻ ነው ሲሉ ገልጸዋል።

ኢነርጂ ያልፈጠሩ ሀገራት ሰለጠንን ቢሉም የእነርሱ ዕድገት በስልጣኔ ደረጃ ሊወሰድ የሚችል አይደለም ብለዋል።

 

ኢነርጂን በብዛት መፍጠር ለኢንዱስትሪ፣ ለግብርና፣ ለከተሜነት (ለስልጣኔ) እና ለቴክኖሎጂ ግብዓት እንደመፍጠር ይቆጠራል ነው ያሉት።

አፍሪካ ውስጥ ካሉ አስራ አምስት (15) ትላልቅ ግድቦች፣ አራቱ ኢትዮጵያ ውስጥ እንደሚገኙ ጠቅላይ ሚኒስትሩ ተናግረዋል።

በደረጃም ተከዜ አስራ አንደኛ፣ ጊቤ ሰባተኛ፣ ኮይሻ ሁለተኛ እና ታላቁ የኢትዮጵያ ሕዳሴ ግድብ ደግሞ አንደኛ ደረጃ ላይ ይገኛሉ ብለዋል።

ኢትዮጵያ አሁን ከውሃ (ሃይድሮ) የምታመርተው ኢነርጂ ሀገሪቱ ካላት የማምረት አቅም ጋር ሲነፃፀር ገና ብዙ መሥራት ይጠበቅባታል ብለዋል።

የኢትዮጵያ ወቅታዊ የማምረት አቅም ከአፍሪካ አንፃር ከፍተኛ ቢሆንም ካለን አጠቃላይ አቅም አንፃር ሲታይ ግን ብዙ ይቀረናል ነው ያሉት።