መንግሥት በሁሉም ዘርፎች ጥራትን ለማረጋገጥ ትኩረት ሰጥቶ እየሰራ ነው - ፕሬዚዳንት ታዬ አጽቀሥላሴ

አዲስ አበባ፤ ሕዳር 20/2018(ኢዜአ)፦ መንግሥት በሁሉም ዘርፎች ጥራትን ለማረጋገጥ ትኩረት ሰጥቶ እየሰራ መሆኑን የኢፌዴሪ ፕሬዚዳንት ታዬ አጽቀሥላሴ ገለጹ።

12ኛው ዙር ሀገር አቀፍ የኢትዮጵያ የጥራት ሽልማት ሥነ ሥርዓት መርሃ ግብር በብሔራዊ ቤተ መንግሥት ተካሂዷል።

በመርሃ ግብሩ ላይ የኢንዱስትሪ ሚኒስትር መላኩ አለበል፣ የንግድና ቀጣናዊ ትስስር ሚኒስትር ዴኤታ ዕንዳለው መኮንን፣ ከፍተኛ የመንግሥት የሥራ ኃላፊዎች፣ የ12ኛ ዙር ሀገር አቀፍ የጥራት ተወዳዳሪዎችና ጥሪ የተደረገላቸው እንግዶች ተገኝተዋል።

የኢፌዴሪ ፕሬዚዳንት ታዬ አጽቀሥላሴ በመርሃ ግብሩ ላይ እንደተናገሩት፤ መንግሥት በሁሉም ዘርፎች ጥራትን ለማረጋገጥ በርካታ ተግባራትን በማከናወን ላይ ይገኛል።

ለአብነትም በአፍሪካ ግንባር ቀደም የሆነ የጥራት ማዕከል በመገንባት በዓለም ደረጃ ተወዳዳሪ ለመሆን እየሰራ መሆኑን ገልጸዋል።

በጥራት ማምረት የሀገርን እድገት በጠንካራ መሠረት ላይ ለመገንባት ስለሚያስችል ማዕከሉ መገንባቱን ነው ያመለከቱት።

አሁን ባለንበት ዘመን ጥራት የቅንጦት ጉዳይ አይደለም ያሉት ፕሬዚዳንቱ፤ በውድድር ዓለም ልቆ ለመገኘት፣ ለመታየትና ይበልጥ ለማደግ ዋና መስፈርትም መሆኑን አብራርተዋል።

በዛሬው ዕለት የተካሔደው ሽልማት በአገልግሎትና ምርት ጥራት ብቻ ሳይሆን ድርጅቶቹ በተከተሉት አመራር፣ በደንበኛ አያያዝ እንዲሁም በሰው ኃብት አመራር ላይም ባከናወኑት ተግባራት ነው ብለዋል።

በተጨማሪም ድርጅቶቹ ለፈጠሩት የሥራ ዕድል፣ ለሀገር ባበረከቱት ትሩፋትና ጸጋ እንዲሁም ተገልጋይና ተጠቃሚን ለማርካት በመቻላቸው እንደሆነም አመልክተዋል።

የአዲስ አበባ ዩኒቨርሲቲ ተጠባባቂ ፕሬዚዳንትና የኢትዮጵያ የጥራት ሽልማት ድርጅት ቦርድ ሰብሳቢ ሳሙኤል ክፍሌ (ዶ/ር) በዚሁ ወቅት እንዳሉት፤ ኢትዮጵያን ወደ ተሟላ ብልጽግና ለማድረስ የማደግና የመልማት ፍላጎቷን ለማሳካት የሁሉም ተቋማት ተወዳዳሪነትና ዘላቂነትን ቋሚ ሥራ አድርጎ መያዝ ያስፈልጋል።

ኢትዮጵያ የምታስበው ጥራት ያለው የኑሮ ደረጃና ብልጽግና ላይ ለመድረስ የምትችለው ተወዳዳሪ በሆኑ ድርጅቶችና ተቋማት እንደሆነ አመልክተዋል።

በአንደኛ ደረጃ የልህቀት አሸናፊ በመሆናቸው ከፕሬዚዳንት ታዬ አጽቀሥላሴ እጅ ሽልማታቸውን የተረከቡት ሳፋሪ ኮም ኢትዮጵያ ቴሌኮሙኒኬሽን ፒኤልሲ፣ ሆራይዘን አዲስ ጎማ ኃላፊነቱ የተወሰነ የግል ማኅበር፣ የኢትዮጵያ አየር መንገድ እና ሄኒከን ቢራ ፋብሪካ ናቸው።

ለሦስት ተከታታይ ጊዜያት አንደኛ ደረጃ ሽልማት የልህቀት ዋንጫ በማሸነፍ የልዩ ዋንጫ ተሸላሚ የሆነው ሆራይዘን አዲስ ጎማ ኃላፊነቱ የተወሰነ የግል ማኅበር ከፕሬዚዳንት ታዬ እጅ ሽልማቱን ተቀብሏል።

#Ethiopian_News_Agency   #ኢዜአ