የአጼ ፋሲል አብያተ መንግስት እድሳት ሀገራዊ ቅርሶችን ከጉዳት ጠብቆ ማቆየት እንደሚቻል ትልቅ ምሳሌ ነው 

ጎንደር፤ ሕዳር 20/2018(ኢዜአ)፡- የአጼ ፋሲል አብያተ መንግስት እድሳትና ጥገና ስራ ሀገራዊ ቅርሶችን ከጉዳት ጠብቆ ማቆየት እንደሚቻል ትልቅ ምሳሌ ነው ሲሉ ቅርሱን የጎበኙ የላሊበላ ከተማና የላስታ ወረዳ ነዋሪዎች ተናገሩ። 

ጎብኚዎቹ  በጎንደር ከተማ እየተከናወነ የሚገኘውን  የኮሪደር ልማትና የአጼ ፋሲል አብያተ መንግስትን ተዘዋውረው ተመልክተዋል፡፡

 

ከጎብኚዎቹ መካከል የቅዱስ ላልይበላ ቅርስ ዋና አስተዳዳሪ አባ ሕርያቆስ ጸጋዬ በሰጡት አስተያየት፤  የአጼ ፋሲል አብያተ መንግስት ታሪክን ጥበብንና ስልጣኔን አቅፎ የያዘ ታላቅ የታሪክ አሻራ ነው ብለዋል፡፡ 

ይህ ታሪካዊና አለም አቀፍ ቅርስ ጥንታዊ ይዘቱን በጠበቀ መንገድ ታድሶና ተጠግኖ ለጎብኚዎች ክፍት መደረጉ መንግስት ለታሪካዊ ቅርሶች ጥበቃና ልማት የሰጠው ልዩ ትኩረት ማሳያ ነው ሲሉ ገልጸዋል። 

 

የአጼ ፋሲል አብያተ መንግስት የቅርስ ጥገናና እድሳት የላሊበላ  ውቅር አብያተ ክርስቲያናት ቅርሶችን ለመጠገን ተሞክሮና ሞዴል የሚወሰድበት ነው ያሉት  የላስታ ወረዳ ባሕልና ቱሪዝም ጽህፈት ቤት ሃላፊ ወይዘሮ ላስታወርቅ አያሌው ናቸው፡፡ 

 

የከተማው የኮሪደር ልማት ስራዎችም ለከተማው ተጨማሪ ውበትን ያጎናጸፉና የቱሪዝም ፍሰቱን በመጨመር በኩል ከፍተኛ ፋይዳ እንዳላቸው ጠቁመው፤  ተሞክሮና ልምድ የሚቀሰምባቸው ናቸው ብለዋል፡፡

የላስታ ወረዳ  ምክር ቤት አባል ቄስ ታደሰ ሞላ በበኩላቸው፤በጎንደር ከተማ እየተከናወኑ የሚገኙ የልማት ፕሮጀክቶች የሕዝቡና የከተማ አስተዳደሩ  የጋራ ቅንጅትና የተግባር ውጤት እንደሆነ  መገንዘባቸውን  ተናግረዋል፡፡

 

ጎንደር የጥበብና የስልጣኔ  የታሪክ አሻራ ያላት ከተማ ነች ያሉት ቄስ ታደሰ ፤ ወደ አካባቢያቸው ሲመለሱ ያገኙትን ተሞክሮ ለማካፈል ቁርጠኛ መሆናቸውን ገልጸዋል፡፡

በፌደራልና በክልሉ መንግስት ልዩ ትኩረትና ድጋፍ ጎንደር ከተማ የበርካታ የልማት እድሎች ተቋዳሽ መሆን ችላለች ያሉት የከተማ አስተዳደሩ ተቀዳሚ ምክትል ከንቲባ አቶ ቻላቸው ዳኘው ናቸው፡፡

 

በከተማው ተፈጻሚ የሆኑት የልማት ፕሮጀክቶች በሕዝቡና በከተማ አስተዳደሩ የጋራ ቅንጅት የተከናወኑ መሆናቸውን ጠቁመው፤ ጎብኚዎቹ የተመለከቷቸው ፕሮጀክቶች ምርጥ ተሞክሮ ሊሆኑ የሚችሉ ናቸው ብለዋል፡፡

በጎንደር ከተማ ጉብኝት ያደረጉት ከአመራሮች፣ ከሀገር ሽማግሌዎች ፣ ከሃይማኖት መሪዎች እና ከወጣቶች  የተውጣጡ  የላሊበላ  ከተማና  የላስታ ወረዳ   ነዋሪዎች  ናቸው፡፡