በብሔራዊ ሙዚየም ያደረግነው ጉብኝት ‎ስለኢትዮጵያ እንድናውቅ አድርጎናል - የምስራቅ አፍሪካ ሀገራት ጋዜጠኞች

አዲስ አበባ፤ ህዳር 20/2018(ኢዜአ)፦ በኢትዮጵያ ብሔራዊ ሙዚየም ያደረጉት ጉብኝት ‎የኢትዮጵያን ታሪክና የቅርስ ሀብት በማወቅ በአፍሪካ ያላትን ስፍራ ለመረዳት አስችሎናል ሲሉ ከተለያዩ የምስራቅ አፍሪካ ሀገራት የመጡ ጋዜጠኞች ገለጹ።

ሶስተኛው የምስራቅ አፍሪካ የልማት በይነ መንግሥታት(ኢጋድ) ሚዲያ አዋርድ መርሃ ግብር በአዲስ አበባ መካሄድ የጀመረ ሲሆን፤ በዚህ መርሃ ግብር ፐልስ ኦፍ አፍሪካ(pulse of Africa) የሚዲያ አጋር ነው፡፡

በሚዲያ አዋርዱ ለመሳተፍ የመጡ ጋዜጠኞች የኢትዮጵያ ብሄራዊ ሙዚየምን ጎብኝተዋል።

 

ጉብኝታቸውን አስመልክቶ ጋዜጠኞቹ እንደገለጹት፤ በሙዚየሙ የኢትዮጵያን ታሪክ የሚያሳዩ በርካታ ቅርሶችን ተመልክተዋል።

ኬኒያዊቷ ጋዜጠኛ ማያማን ሙጋንዳ፤ ጉብኝቱ የሰው ዘር መገኛ ስለሆነችው ኢትዮጵያ እውቀት እንዳስጨበጣት ተናግራለች።

ከእነዚህ መካከል 'ሉሲ' (ድንቅነሽ) ቅሪተ አካልን መመልከቷ ልዩ ደስታ እንደሰጣት አስታውቃለች።

ከሱማሊያ የመጣው ጋዜጠኛ አህመድ አቢጂያ እንደተናገረው፤ የሰው ዘር መገኛ የሆነችውን ኢትዮጵያ እና የሉሲን ቅሪተ አካል ማየት በመቻሉ ታላቅ ስሜት አሳድሮበታል።

ሙዚየሙ አስደማሚ ታሪክና ውድ ቅርሶችን መያዙን መመልከቱን ጠቅሶ፤ ይህም በኢትዮጵያ ቱሪዝም እንዲስፋፋ ማድረግ የሚያስችል ከፍተኛ ሃብት መሆኑን ገልጿል።

 

በሙዚየሙ የተመለከተቻቸው ቅርሶች ብዛትና ታሪካዊ ፋይዳቸው ልዩ ደስታ እንደሰጧት የተናገረችው ደግሞ ከኡጋንዳ የመጣችው ጋዜጠኛ ኢሌንዳ ሲንደሬላ ነች።

ኢትዮጵያ በአፍሪካ ታሪክና ቅርስ ያላትን ቦታ በደንብ መረዳቷን ተናግራ ወደ ሀገሯ ስትመለስ ያየችውን ታሪክ ለሀገሯ ዜጎች እንደምታካፍል አስታውቃለች።

ጋዜጠኞቹ በአዲስ አበባ ልማት እና እድገት መደነቃቸውን ገልጸው፤ ሁሉም አፍሪካዊ ኢትዮጵያን መጎብኘት እንዳለበት ጠቁመው የህዝቡ እንግዳ ተቀባይነት አስደሳች መሆኑን ጠቅሰዋል።