የድሬዳዋን ባህላዊና ተፈጥሯዊ የቱሪዝም ሀብቶች በማልማትና በማስተዋወቅ የዘርፉን አቅም ማሳደግ ይገባል

ድሬዳዋ ፤ ሕዳር 20/2018 (ኢዜአ)፡-የድሬዳዋን ባህላዊና ተፈጥሯዊ የቱሪዝም ሀብቶች በማልማትና በማስተዋወቅ የዘርፉን ሁለንተናዊ ጥቅም ማሳደግ እንደሚገባ የቱሪዝም ሚኒስትር ሰላማዊት ካሳ ተናገሩ።

በቱሪዝም ሚኒስትር ሰላማዊት ካሳና በዩኔስኮ የኢትዮጵያ ዳይሬክተር ሪታ ቢስኖውዝ (ዶ/ር) የተመራ እና ተቀማጭነታቸው አዲስ አበባ የሆኑ የተለያዩ አገራት አምባሳደሮችና የዲፕሎማቲክ ተቋማት ተወካዮች የሐረር ከተማ ጉብኝታቸውን አጠናቀው ዛሬ ድሬዳዋ ገብተዋል።

ድሬዳዋ ሲደርሱም በአስተዳደሩ የኪነ ጥበብ ቡድን የብሔረሰቦችን ባህላዊና ትውፊታዊ ሙዚቃና ውዝዋዜ በማሳየት አቀባበል ተደርጎላቸዋል። 

 

በስነስርዓቱ ላይ የቱሪዝም ሚኒስትሯ ሰላማዊት ካሳ እንዳሉት፤ ድሬዳዋ የሀገር ውስጥና የውጭ ቱሪስቶችን መሳብ የሚችሉ   የቱሪዝም  ሀብቶች ባለቤት  መሆኗን ተናግረዋል ።

እነዚህን  ሰውሰራሽና  ተፈጥሯዊ  የቱሪዝም ሀብቶች በማልማትና በማስተዋወቅ የዘርፉን ሁለንተናዊ ጠቀሜታ ማሳደግ ይገባል ብለዋል።

ዛሬ በድሬዳዋ የተገኙት  አምባሳደሮችና የዲፕሎማቲክ ተቋማት ተወካዮች እነዚህን  የቱሪዝም ሀብቶች መጎብኘታቸው  የዘርፉን እድገትና ፋይዳ ለማጉላት መደላድል  እንደሚፈጥርም ሚኒስትሯ ጠቁመዋል።

 

የድሬዳዋ አስተዳደር ከንቲባ ከድር ጁሃር በበኩላቸው፤ ድሬዳዋ ብሔሮች፣ ብሔረሰቦች እና ህዝቦች በፍቅር፣ በሰላም እና በአንድነት ተዋደው የሚኖሩባት  መሆኗን  አንስተዋል።

በድሬዳዋ ያሉ ቅርሶችና የቱሪስት መዳረሻዎችን በማልማት ኢኮኖሚያዊና ማህበራዊ ፋይዳቸውን ለማሳደግ ትኩረት ተሰጥቶ መሰራቱን ተናግረዋል ።

 

የአምባሳደሮች እና የዲፕሎማቲክ ማህበረሰብ አካላት ወደ አካባቢው መምጣት ተፈጥሯዊና ሰው ሰራሽ ሃብቶችን  ከመጎብኘት ባለፈ የመረጃዎቹን ተደራሽነት በማስፋት የዘርፉን ጥቅም ለማሳደግ እድል ይሰጣል ብለዋል።

በምስራቁ  የኢትዮጵያ  ክፍል  ውብና ድንቅ ታሪካዊና  ባህላዊ ማንነቶች መመልከታቸውን የተናገሩት ደግሞ በኢትዮጵያ የዩኔስኮ ዳይሬክተር ሪታ ቢስኖውዝ (ዶ/ር) ናቸው።

በድሬዳዋ የተደረገላቸው ደማቅ አቀባበልም ይህንኑ  የሚያረጋግጥ መሆኑን  ገልጸዋል።

 

በቱሪዝም ሚኒስትሯ ሰላማዊት ካሳ እና በዩኔስኮ የኢትዮጵያ ዳይሬክተር የተመራው የዲፕሎማቲክ ማህበረሰብ ቡድን በአሁን ወቅት በድሬዳዋ እየተካሄዱ የሚገኙ የልማት ፕሮጀክቶችንና የቱሪዝም ሃብቶችን እየጎበኘ ነው።