አዲስ አበባ ከተማ በሁሉም ብሔሮች፣ ብሔረሰቦችና ህዝቦች ውብ ሆና እየተገነባች ነው - ከንቲባ አዳነች አቤቤ

አዲስ አበባ፤ ህዳር 20/2018(ኢዜአ)፦ አዲስ አበባ ከተማ በሁሉም ብሔሮች፣ ብሔረሰቦችና ሕዝቦች ውብ ሆና እየተገነባች የኢትዮጵያውያን መድመቂያ እየሆነች ትገኛለች ሲሉ ከንቲባ አዳነች አቤቤ ገለጹ።

የአዲስ አበባ ከተማ አስተዳደር 20ኛው የብሔር ብሔረሰቦች እና ህዝቦች ቀን በከተማ ደረጃ የማጠቃለያ ፕሮግራም ተካሂዷል፡፡

በበዓሉ አከባበር ላይ የፌዴሬሽን ምክር ቤት አፈ-ጉባኤ አገኘሁ ተሻገር፣ የአዲስ አበባ ከተማ አስተዳደር ከንቲባ አዳነች አቤቤ፣ የአዲስ አበባ ከተማ አስተዳደር ምክር ቤት አፈ-ጉባኤ ቡዜና አልከድር፣ የህዝብ ተወካዮች ምክር ቤት ምክትል አፈ-ጉባኤ ሎሚ በዶ፣ የሁሉም ክልሎች አፈ-ጉባኤዎች፣ ከፍተኛ የመንግስት የሥራ ኃላፊዎች፣ የከተማዋ ነዋሪዎች እና ጥሪ የተደረገላቸው እንግዶች ታድመዋል፡፡

 

ከንቲባ አዳነች አቤቤ፤ ለ20ኛው የብሔረ-ብሔረሰቦችና ህዝቦች ቀን የእንኳን አደረሳችሁ መልዕክት ባስተላለፉበት ወቅት፤በብዝሃነት ውበት የደመቀችው ኢትዮጵያ፣ ህብረ ብሔራዊ አብሮነትንና ጠንካራ አንድነትን እየገነባች መሆኗን ተናግረዋል፡፡

የኢትዮጵያ ማንሰራራት በልማት ስራዎች ብቻ ሳይሆን ህዝቦች የበለጠ ማንነታቸውን፣ ትውፊታቸውንና ወጋቸውን እርስ በእርስ በማክበርና በማጎልበት ጭምር ይሳካል ብለዋል፡፡

የሀገራችን ብሔር ብሔረሰቦችና ሕዝቦች ለአንድነታቸው ሰፊ ስፍራ በመስጠት ለኢትዮጵያ ብልጽግና እጅ ለእጅ ተያይዘው የሚሰሩበት ምዕራፍ ላይ መሆናቸውንም ገልጸዋል፡፡

ሁሉም ብሔረ ብሔረሰብ የራሱ የሆነ ቋንቋ፣ አስደናቂ የሆነ ባህል፣ ለትውልድ የሚተላለፍ ልማድና ወግ ያለው መሆኑን ጠቁመው ይህ ልዩ ሀገራዊ ድንቅ መልክና የማይተካ የመስህብ አቅም መሆኑን ተናግረዋል፡፡

ከንቲባዋ በመልዕክታቸው አዲስ አበባ የብዝሃነት እና የውበት ደማቅ መገለጫ፤ የሁላችንም የጋራ ቤት ናት ብለዋል፡፡

 

አዲስ አበባ የኢትዮጵያ ብሔር ብሔረሰቦችና ህዝቦች በጋራ ሆነው እየገነቧት ያለች እና መላ ኢትዮጵያውያንን እያደመቀች የምትገኝ ከተማ መሆኗን ገልጸዋል።

በጋራ ቤታችን የጋራ ማንነትን እያጸናን፣ እርስ በእርስ እየተማማርን፣ እየተደጋገፍን ጠንካራ አብሮነትን መገንባታችንን አጠናክረን እንቀጥላለን ነው ያሉት፡፡

ከተማዋ ባለፉት የለውጥ ዓመታት የተገበረቻቸው ሁሉን አካታች ልማትና የመልካም አስተዳዳር ስራዎች ብዝሃነትን በማክበር፣ እኩል ተጠቃሚነትንና የነዋሪዎችን ሙሉ ተሳትፎ በማረጋገጥ አስደናቂ ለውጦች መመዝገባቸውን ገልጸዋል፡፡

አዲስ አበባን የብልፅግና ተምሳሌት እና ለነዋሪዎቿ ምቹ ከተማ የማድረግ ሥራ ተጠናክሮ እንደሚቀጥልም አረጋግጠዋል።

 

20ኛው የብሔሮች፣ ብሔረሰቦችና ሕዝቦች ቀን "ዲሞክራሰያዊ መግባባት ለህብረ ብሔራዊ አንድነት" በሚል መሪ ሀሳብ በፌዴሬሽን ምክር ቤት አስተባባሪነት በማዕከላዊ ኢትዮጵያ ክልል አስተናጋጅነት ህዳር 29 ቀን 2018 ዓ.ም በሆሳዕና ከተማ ይከበራል።