የኢፌዴሪ አየር ኃይል 90ኛ ዓመት የምስረታ በዓል የ10 ኪሎ ሜትር ሩጫ ነገ በቢሾፍቱ ይካሄዳል

አዲስ አበባ፤ ሕዳር 20/2018 (ኢዜአ)፦ የኢፌዴሪ አየር ኃይል 90ኛ ዓመት የምስረታ በዓል በማስመልከት የተዘጋጀው ቢሾፍቱ ዓለም አቀፍ የ10 ኪሎ ሜትር የጎዳና ላይ ሩጫ ነገ በቢሾፍቱ ከተማ ይደረጋል።

የኢፌዴሪ አየር ኃይል 90ኛ ዓመት የምስረታ በዓሉን በተለያዩ ዝግጅቶች እያከበረ ይገኛል።

የምስረታ በዓሉ አካል የሆነው ቢሾፍቱ ዓለም አቀፍ የ10 ኪሎ ሜትር የጎዳና ላይ ሩጫ ነገ ሕዳር 21 ቀን 2018 ዓ.ም ይካሄዳል።

በውድድሩ ላይ ከ25 ሺህ ሰው በላይ እንደሚሳተፍ የኢትዮጵያ አትሌቲክስ ፌዴሬሽን አስታውቋል። 

በጎዳና ላይ ሩጫው ከጎረቤት ሀገራት ጭምር አትሌቶች እንደሚሳተፉ ተገልጿል።

በሩጫው ሁለቱም ጾታዎች ለሚያሸንፉ ተወዳዳሪዎች በተመሳሳይ 500 ሺህ ብር ሽልማት ይበረከትላቸዋል። 

ሁለተኛ ደረጃን  ይዘው ለሚያጠናቅቁ250 ሺህ ብር፣ ሶስተኛ ደረጃ ለሚወጡ 100 ሺህ ብር፣ አራተኛ ለሚወጡ 50 ሺህ ብር እና አምስተኛ ለሚወጡ አትሌቶች የ25 ሺህ ብር ሽልማት እንደሚበረከትላቸውም ተገልጿል።

በክለብ ደረጃ በሁለቱም ጾታዎች አንደኛ ለሚወጡ አትሌቶች የ100 ሺህ ብር ተሸላሚ እንደሚሆኑም ፌዴሬሽኑ ገልጿል።

የኢፌዴሪ አየር ኃይል ዋና አዛዥ ሌተናል ጄኔራል ይልማ መርዳሳ የአየር ኃይል 90ኛ ዓመት የምስረታ በዓሉን አከባበር በማስመልከት በቅርቡ በሰጡት ጋዜጣዊ መግለጫ ላይ ለኢትዮጵያ አየር ኃይል በሙሉ አቅሜ ሮጣለሁ" በሚል መሪ ሀሳብ 10 ኪሎ ሜትር ሩጫ እንደሚካሄድ ገልጸዋል።

ሩጫው በየዓመቱ ቋሚ ሆኖ የሚቀጥል መሆኑን በመጥቀስ በሩጫው ሁሉም መሳተፍ እንደሚችል ጠቁመዋል።

#Ethiopian_News_Agency 
#ኢዜአ