የቱሪዝም መዳረሻዎች ልማት ለዘርፉ ከፍተኛ መነቃቃት ፈጥሯል

አዲስ አበባ፤ ህዳር 20/2018(ኢዜአ)፦ መንግስት ለቱሪዝም መዳረሻዎች ልማት የሰጠው ትኩረት ዘርፉን በከፍተኛ ሁኔታ በማነቃቃት ለኢኮኖሚ ዕድገት ትልቅ አስተዋፅኦ እንዲያበረክት እያደረገ መሆኑ ተመላክቷል።

ኢትዮጵያ ከቅርብ ጊዜ ወዲህ በብዝሃ ኢኮኖሚ ግንባታ በትኩረት እየሰራችባቸው ካሉ ዘርፎች መካከል አንዱ ቱሪዝም ነው።

በዚህም የአዳዲስ የቱሪስት መዳረሻዎች ልማትና የነባር መዳረሻዎች እድሳት በስፋት እየተከናወነ ሲሆን ይህም የቱሪስት ፍሰቱና የቱሪዝም ዘርፉ ለኢኮኖሚው የሚያበረክተው ድርሻ እንዲያድግ አስችሏል።

 

የኢትዮጵያ ቱር ኦፕሬተር ማህበር ፕሬዘዳንት ፍጹም ገዛኸኝ ለኢዜአ እንዳሉት፤ መንግስት የቱሪዝም ዘርፉን ከአምስቱ የኢኮኖሚ ምሰሶ አንዱ በማድረግ ያከናወናቸው ተግባራት ውጤት እያስመዘገቡ ነው።

ይህም የቱሪዝም ዘርፉ ለአጠቃላይ ለሀገራዊ ኢኮኖሚ ያለውን ድርሻ ማሳደግ ያስቻለ መሆኑንም ተናግረዋል።

የሀገር ውስጥ ቱሪዝምን የማበረታታት ስራ የዘርፉን ማህበራዊና ኢኮኖሚያዊ ጠቀሜታ ከማሳደግ ባለፈ አብሮነትን ለማጠናከር አስተዋፅዖ የሚያደርግ ነው ብለዋል።

 

ኢትዮጵያ የቱሪዝም መዳረሻዎችን በማልማትና በማስተዋወቅ በኩል ተሞክሮ የሚወሰድባቸው ተግባራት ማከናወን መቻሏንም ተናግረዋል።

ይህም የቱሪዝም ዘርፉን ተወዳዳሪነትና በዘርፉ የተሰማሩ አካላትን ኢኮኖሚያዊ ተጠቃሚነት ለማሳደግ ያስቻለ መሆኑን ገልጸዋል።

 

የቴማ ቱር ኢትዮጵያ ባለቤትና ዋና ስራ አስኪያጅ ቴዎድሮስ ሰለሞን እንዳሉት፤ የቱሪስት መዳረሻዎች ልማት ኢትዮጵያ ያሏትን የቱሪዝም ሀብቶች ለዓለም ለማስተዋወቅ የሚረዱ ናቸው።

የቱሪስት መዳረሻዎች ልማት በዘርፉ የሚፈጠሩ የስራ እድሎችን ለማስፋት ምቹ መደላድል መፍጠራቸውንም ጨምረው ተናግረዋል።

 

በቱሪዝም ሚኒስቴር የፕሮሞሽን ዘርፍ መሪ ሥራ አስፈጻሚ ተሾመ ተክሉ መንግስት የቱሪዝም ዘርፉን ለማነቃቃትና ለኢኮኖሚ የሚያበረክተውን አስተዋፅኦ ማሳደግ የሚያስችሉ ተግባራት ማከናወኑን ገልጸዋል።

ለቱሪዝም ዘርፍ የተሰጠው ትኩረት ለስራ እድል ፈጠራ ያለውን ድርሻ እና የቱሪስት ፍሰቱን ማሳደግ በመቻሉ ከዘርፉ የሚገኘው ገቢ እያደገ መምጣቱን ተናግረዋል።