በከማሺ ዞን የነበረው የፀጥታ ችግር ተፈቶ ሰላም መስፈኑ ህብረተሰቡን የልማት ተጠቃሚ አድርጓል

አሶሳ ፤ ሕዳር 20/2018 (ኢዜአ)፡-በቤኒሻንጉል ጉሙዝ ክልል ከማሺ ዞን የነበረው የፀጥታ ችግር ተፈቶ ሰላም መስፈኑ ህብረተሰቡን የልማት ተሳታፊና ተጠቃሚ ማድረጉን ርዕሰ መስተዳድር አሻድሊ ሀሰን ተናገሩ።

20ኛው የኢትዮጵያ ብሔሮች፣ ብሔረሰቦች እና ህዝቦች ቀን የማጠቃለያ በዓል "ዲሞክራሲያዊ መግባባት ለሕብረ ብሔራዊ አንድነት" በሚል መሪ ቃል በክልሉ ከማሽ ዞን ከማሺ ከተማ ተከብሯል።

የቤኒሻንጉል ጉሙዝ ክልል ርዕሰ መስተዳድር አቶ አሻድሊ ሀሰን እንደተናገሩት፤ በከማሺ ዞን በነበረ የሠላም እጦት የልማት ስራዎች በሚፈለገው ልክ እየተከናወኑ አልነበረም።

 

ከቅርብ ዓመታት ወዲህ ህብረተሰቡ ለሠላም ባሳየው ቁርጠኝነት በዞኑ ሠላም ማረጋገጥ መቻሉንና ይህንንም ማስቀጠል እንደሚገባ ተናግረዋል።

የፀጥታ አካላት፣ የሀገር ሽማግሌዎች እና የሀይማኖት አባቶች ችግሮች በውይይት እንዲፈቱና በዞኑ ሠላም እንዲሰፍን የነበራቸው ሚና ከፍተኛ እንደነበርም አቶ አሻድሊ አስታውሰዋል።

በአሁኑ ወቅት በዞኑ የሰፈነውን ሠላም በመጠቀም ህብረተሰቡ በእርሻ፣ በማዕድን እና በተለያዩ የልማት ሥራዎች እየተሳተፈ ተጠቃሚ እየሆነ መምጣቱን ገልጸዋል።

 

የብሔሮች፣ ብሔረሰቦችና ህዝቦች ቀን በዓል በክልል ደረጃ በዞኑ መከበሩም የህዝቦችን አብሮነት ለማጉላትና ወንድማማችነትን ለማጠናከር እንደሚያግዝ አቶ አሻድሊ ጠቁመዋል።

የቤኒሻንጉል ጉሙዝ ክልል ምክር ቤት አፈጉባኤ አስካለች አልቦሮ በበኩላቸው፤ በዞኑ የተለያዩ ብሔሮችና ብሔረሰቦች በአብሮነት በጋራ እንደሚኖሩ ገለፀው፣ በዓሉ ይህንን ለማጠናከር ከፍተኛ አስተዋጽኦ ይኖረዋል ብለዋል።

 

በዓሉ ብሔር፣ ብሔረሰቦች ማንነታቸውን የሚያንፀባርቁበት እንዲሁም በጋራ ጉዳይ ላይ አንድነታቸውን የሚያጸኑበት ሊሆን ይገባል ነው ያሉት።

20ኛው የኢትዮጵያ ብሔሮች፣ ብሔረሰቦች እና ህዝቦች ቀን ኢትዮጵያውያን በሀገራዊ አጀንዳዎች ላይ በጋራ መቆም ባለባቸው ወቅት የሚከበር መሆኑም ልዩ ያደርገዋል ብለዋል።

በከማሺ ዞን የተገኘው ሠላም ህብረተሰቡ የአካባቢውን ፀጋ አልምቶ ተጠቃሚ እንዲሆን እያስቻለ ነው ያሉት ደግም የዞኑ ዋና አስተዳዳሪ አቶ ብጅጋ ፃፊዮ ናቸው።   

 

እንደ አስተዳዳሪው ገለጻ ዞኑ የተለያዩ ብሔሮችና ብሔረሰቦች በአብሮነት የሚኖሩበት እና በአሁኑ ወቅትም አስተማማኝ ሠላም የሰፈነበት ነው።

በዓሉ በፓናል ውይይት እና በተለያዩ ስፖርታዊ ዝግጅቶች እየተከበረ የቆየ ሲሆን በማጠቃለያውም የክልሉ ከፍተኛ አመራሮች፣ በክልሉ የሚገኙ የብሔር ብሔረሰቦች ተወካዮች እንዲሁም የከማሺ ከተማ ነዋሪዎች ተገኝተዋል።