ክልሉ 20ኛውን የብሔሮች፣ ብሔረሰቦችና ሕዝቦች ቀን ማስተናገዱ ለኢኮኖሚያዊ እንቅስቃሴ የጎላ ፋይዳ አለው

አዲስ አበባ፤ ህዳር 20/2018 (ኢዜአ)፡- የማዕከላዊ ኢትዮጵያ ክልል 20ኛውን የብሔሮች፣ ብሔረሰቦችና ሕዝቦች ቀን ማስተናገዱ የክልሉ ጸጋዎች ለማስተዋወቅና ለኢኮኖሚያዊ እንቅስቃሴ የጎላ ፋይዳ እንዳለው ተገለጸ።

20ኛው የኢትዮጵያ ብሔሮች፣ ብሔረሰቦች እና ሕዝቦች ቀን “ዴሞክራሲያዊ መግባባት ለኅብረ ብሔራዊ አንድነት” በሚል መሪ ሐሳብ በማዕከላዊ ኢትዮጵያ ክልል አስተናጋጅነት ህዳር 29 ቀን 2018 ዓ.ም በሆሳዕና ከተማ ይከበራል።

በዓሉ በክልሉ መከበሩ ከፍተኛ ፋይዳ እንዳለው የማዕከላዊ ኢትዮጵያ ክልል የመንግሥት ኮሙኒኬሽን ቢሮ ኃላፊ ዘሪሁን እሸቱ ለኢዜአ ተናግረዋል።

በዚህም የክልሉን ፀጋዎች ታሪካዊ፣ ተፈጥሯዊ፣ ሰው ሠራሽ የሚዳሰሱና የማይዳሰሱ የቱሪዝም መስኅቦችን ለማስተዋወቅ ከፍተኛ ሚና እንደሚኖረው ገልፀዋል።

በተጨማሪም የክልሉን የኢንቨስትመንት አማራጮችን ጨምሮ በዘርፉ የተከናወኑና የታቀዱ ጉዳዮችን ለማስተዋወቅ ከፍተኛ ዕድል እንደሚፈጥር ጠቁመዋል።

ከዕንግዳ አቀባበል ጋር ተያይዞ የማኅበረሰቡን ዕሴቶች እና ባህሎች አጉልቶ ለማሳየትም ጥሩ ዕድል መሆኑን አንስተዋል።

ወንድማማችነትንና እህትማማችንትን ብሎም ኅብረ ብሔራዊነትን በማጉላት በኩልም ከፍ ያለ ፋይዳ እንዳለውም ነው የተናገሩት።

ቀኑ በክልሉ መከበሩ ያሉ የመልማት ፀጋዎችን በመለየት ተጀምረው የነበሩና አዳዲስ ፕሮጀክቶችን ጭምር በፍጥነት ማጠናቀቅ ማስቻሉ ከፋይዳዎቹ መካከል ተጠቃሽ መሆናቸውን ገልጸዋል።

እንደ ክልል ሕዳር 25 የወንድማማችነት፣ ሕዳር 26 የአብሮነት፣ ሕዳር 27 የማዕከላዊ ኢትዮጵያ ክልል፣ ሕዳር 28 የምክክር እንዲሁም ሕዳር 29 የኢትዮጵያውያን ቀን በሚል ስፖርታዊ ውድድሮችን ጨምሮ በተለያዩ መርሃ ግብሮች እንደሚከበርም አስታውቀዋል።

ሀገር አቀፉን የብሔሮች፣ ብሔረሰቦች እና ሕዝቦች ቀን ምክንያት በማድረግ ሕዳር 22 ቀን 2018 በወልቂጤ ከተማ ባዛር እና ኤግዚቢሽን እንደሚከፈትም ጠቁመዋል።

በሁሉም ከተሞች ለሀገር አቀፉ በዓል የሚመጡ እንግዶችን ለመቀበል ዝግጅት መጠናቀቁንም አስታውቀዋል።