በጤናው ዘርፍ የተቀመጡ ግቦችን ለማሳካት እየተደረጉ ባሉ ሁሉን አቀፍ ጥረቶች አበረታች ውጤት ተመዝግቧል

‎ባሕርዳር፤ ጥቅምት 1/2018(ኢዜአ)፡-  በጤናው ዘርፍ የተቀመጡ የልማት ግቦችን ለማሳካት በክልሉ እየተደረጉ ባሉ ሁሉን አቀፍ ጥረቶች አበረታች ውጤት መመዝገቡን የአማራ ክልል ጤና ቢሮ ገለጸ።

‎‎ቢሮው በክልሉ ከሚንቀሳቀሱ የሲቪል ማህበረሰብ ድርጅቶች ጋር በጤናው ዘርፍ እያከናወኑት ባሉት ተግባራት ዙሪያ ዛሬ በባሕርዳር ከተማ የምክክር መድረክ አካሄዷል።

 

‎‎የቢሮው ምክትል ኃላፊ አቶ መልካሙ ጌትነት በመድረኩ ላይ እንዳመለከቱት፤  እንደሀገር በጤናው ዘርፍ የተቀመጡ የልማት ግቦችን ለማሳካት ክልሉ  የድርሻውን እየተወጣ ነው ።

በዚህም እየተደረጉ ባሉ ሁሉን አቀፍ ጥረቶች አበረታች ውጤት መመዝገቡን ገልጸው፤ በዚህም ተላላፊ በሽታዎች እየቀነሱ እና የእናቶችና ህፃናት ጤና እየተሻሻለ መምጣቱን ጠቅሰዋል።

‎የክልሉ የጤና ስርዓት እንዲሻሻልና በተላላፊ በሽታዎች መቀነስ ለተገኘው ውጤት በክልሉ የሚንቀሳቀሱ የሲቪል ማህበረሰብ ድርጅቶች የበኩላቸውን አስተዋጽኦ ማድረጋቸውን አንስተዋል።

‎በመሆኑም ጤናማና አምራች ዜጋን ለመፍጠር ቢሮው ከአጋር አካላት ጋር የጀመረውን ቅንጅታዊ አሰራር ይበልጥ አጠናክሮ እንደሚቀጥል አስታውቀዋል።ቢሮው የ25 ዓመት የጤናው ዘርፍ ፍኖተ ካርታ ማዘጋጀቱም ተመልክቷል።

‎የመድረኩ ተሳታፊ አጋር  አካላት ለክልሉ የጤና ዘርፍ ውጤታማነት ሲያደርጉት የቆየውን ድጋፍ አጠናክረው እንደሚቀጥሉ ገልጸዋል።

 

በምክክር መድረኩ ላይ የጤና ቢሮ አመራሮችና  በክልሉ የሚንቀሳቀሱ የሰቪል ማህበረሰብ ድርጅቶች ተሳትፈዋል።