ወላይታ ድቻ ከካፍ ኮንፌዴሬሽን ዋንጫ ውድድር ውጪ ሆነ 

አዲስ አበባ፤ መስከረም 17/2018 (ኢዜአ)፦ ወላይታ ድቻ በ2025/26 የካፍ ኮንፌዴሬሽን ዋንጫ የማጣሪያ የመልስ ጨዋታ በሊቢያው አል-ኢትሃድ 3 ለ 1 ተሸንፏል።

ትናንት ማምሻውን በትሪፖሊ ኢንተርናሽናል ስታዲየም በተካሄደው ጨዋታ ናኡፌል ዜርሁኒ፣ ታታያኦኔ ዲትልሆክዌ እና አህመድ አል ቢዚ አስቆጥረዋል።

ቴዎድሮስ ታፈሰ ለወላይታ ድቻ ብቸኛዋን ጎል ከመረብ ላይ አሳርፏል።

ውጤቱን ተከትሎ አል-ኢትሃድ በድምሩ 3 ለ 1 በማሸነፍ ወደ ቀጣዩ ዙር አልፏል።

አል-ኢትሃድ በመጨረሻው ዙር ከግብጹ አል ማስሪ ጋር ይጫወታል።

የወላይታ ድቻ የኮንፌዴሬሽን ዋንጫ ጉዞ በመጀመሪያው ዙር ተገቷል።

ወላይታ ድቻ በካፍ ኮንፌዴሬሽን ዋንጫ ኢትዮጵያን ወክሎ የተሳተፈው የኢትዮጵያ ዋንጫ አሸናፊ መሆኑን ተከትሎ ነው።