ኢትዮጵያ በህገ ወጥ መንገድ የተገኘን ገንዘብ ህጋዊ አስመስሎ የመጠቀም ወንጀልን ለመከላከል ብሔራዊ ኮሚቴ አቋቁማ እየሰራች ነው

አዲስ አበባ፤ ነሐሴ 23/2017(ኢዜአ)፦ ኢትዮጵያ በህገ ወጥ መንገድ የተገኘን ገንዘብ ህጋዊ አስመስሎ የመጠቀም ወንጀልን የሪፎርሙ አካል በማድረግ ብሔራዊ ኮሚቴ አቋቁማ እየሰራች መሆኑን ምክትል ጠቅላይ ሚኒስትር ተመስገን ጥሩነህ ገለጹ፡፡

ኢትዮጵያ የምሥራቅና ደቡባዊ አፍሪካ ጸረ ህገ ወጥ የገንዘብ ዝውውር ቡድን 50ኛው የከፍተኛ ባለሙያዎች፣ 25ኛው የሚኒስትሮች ምክር ቤት ስብሰባ እና ስምንተኛው የመንግስትና የግሉ ዘርፍ የውይይት ፎረምን እያስተናገደች ነው።

 

የምሥራቅና ደቡባዊ አፍሪካ ጸረ ህገ ወጥ የገንዘብ ዝውውር ቡድን 25ኛው የሚኒስትሮች ምክር ቤት ስብሰባ በአፍሪካ ኢኮኖሚክ ኮሚሽን ዛሬ መካሄድ ጀምሯል።

ምክትል ጠቅላይ ሚኒስትር ተመስገን ጥሩነህ በዚህ ወቅት እንዳሉት፤ የምሥራቅና ደቡባዊ አፍሪካ ጸረ ህገ ወጥ የገንዘብ ዝውውር ቡድን ስብሰባ በወሳኝ ሰዓት የተከናወነ ነው።

በአፍሪካ ህገ ወጥ የገንዘብ ዝውውር እና ሽብርተኝነትን በገንዘብ የመደገፍ ወንጀል ድንበር ተሻጋሪና አደገኛ አካሄድ እየሆነ መምጣቱን ገልጸዋል።

የቴክኖሎጂ ዕድገት፣ አንዳንድ አገሮች በፋይናንስ ወይም በተቋማት ውስንነት ምክንያት የምሥራቅና ደቡባዊ አፍሪካ ጸረ ህገ ወጥ የገንዘብ ዝውውር ቡድንን አለመደገፍ ችግሩን እንዲጨምር እንዳደረገው ጠቅሰዋል።

ከአፍሪካ የሚዘረፍ ሃብት የህፃናትን የመማርና የወደፊት ተስፋ የሚያጨልም፣ በሽተኞች ሕክምና እንዳያገኙ የዜጎች የመሰረተ ልማት ጥያቄ እንዳይመለስ የሚያደርግ መሆኑን ገልጸዋል።

ኢትዮጵያ ህገወጥ የገንዘብ ዝውውር እና ሽብርተኝነትን በገንዘብ መደገፍን መከላከል የሪፎርሟ አካል አድርጋ እየሰራች እንደምትገኝ አስታውቀዋል።

ሕገ ወጥ የገንዘብ ዝውውር፣ ሽብርተኝነትን በገንዘብ መደገፍና ማጭበርበርን ማንም አገር ብቻውን መቆጣጠር እንደማይችል ተናግረዋል።

ለዚህም ብሔራዊ ኮሚቴ አቋቁማለች፤ የፋይናንስ ደህንነት ተቋማትና የፍትህ አካላትን አጠናክራለች፣ የግሉን ዘርፍ አቅም ገንብታለች ብለዋል፡፡

የምሥራቅና ደቡባዊ አፍሪካ ጸረ ህገ ወጥ የገንዘብ ዝውውር ቡድንን መደገፍ ወሳኝ መሆኑን የገለጹት ምክትል ጠቅላይ ሚኒስትሩ፤ ጠንካራ ትብብርና ጠንካራ ተቋማት ያስፈልጉናል ብለዋል።

ወንጀሎቹ ድንበር ተሻጋሪና በቴክኖሎጂ የታገዙ መሆናቸውን በማስታወስ፣ ከአፍሪካ አልፎ ዓለም አቀፋዊ ትብብር መፍጠር አስፈላጊ መሆኑን አጽንኦት ሰጥተዋል።

ኢትዮጵያ የምሥራቅና ደቡባዊ አፍሪካ ጸረ ህገ ወጥ የገንዘብ ዝውውር ቡድንን ለመደገፍ ቁርጠኝነቷን አጠናክራ እንደምትቀጥል በማረጋገጥ በጋራ መከላከል የሚያስችል የጋራ ስትራቴጂ መቅረፅ እንደሚገባ ተናግረዋል።