የብልጽግና ፓርቲ ሴቶች ክንፍ ለአገረ መንግሥት ግንባታ ስኬት ሚናውን ሊያጠናክር ይገባል  

አዲስ አበባ፤ ነሐሴ 22/2017(ኢዜአ)፦የብልጽግና ፓርቲ ሴቶች ክንፍ ለአገረ መንግሥት ግንባታ ስኬት ሚናውን ሊያጠናክር እንደሚገባ በፓርቲው የዲሞክራሲ ባህል ግንባታ ዘርፍ ኃላፊ መለሰ ዓለሙ ገለጹ።  

የፓርቲው ሴቶች ክንፍ ምክር ቤት የ2017 በጀት ዓመት ዕቅድ አፈጻጸም እና 2018 በጀት ዓመት ዕቅድ ላይ  ውይይት አካሄዷል፡፡  

ክንፉ ሴቶችን በማህበራዊ ፣ ኢኮኖሚና ፖለቲካ መስኮች ተጠቃሚ ለማድረግ ባከናወናቸው ተግባራት፣ በተገኙ ውጤቶችና ቀጣይ አቅጣጫዎች ላይ ተወያይቷል፡፡ 

 

በብልፅግና ፓርቲ የዋና ጽሕፈት ቤት የዴሞክራሲ ባህል ግንባታ ዘርፍ ኃላፊ መለሰ ዓለሙ በዚሁ ወቅት እንዳሉት፤ ክንፉ እቅዶችን ወደ ተግባር የመቀየር  አቅሙ እያደገ መምጣቱ ለውጤታማነቱ መሰረት ጥሏል።    

በኢትዮጵያ የሴቶችን ጥያቄ ጨምሮ መልስ የሚሹ መሰረታዊ ጉዳዮችን በአስተማማኝ መልኩ ተደራሽ ለማድረግ ግብ መያዙን አስታውሰው፤ ግቡ እንዲሳካ የክንፉ አመራርና አባላት ድርሻ የጎላ ሊሆን ይገባል ብለዋል።   

ጠንካራ ሀገረ መንግሥት ግንባታ  እውን ለማድረግ በሚደረገው ጥረትም የክንፉ ሚና የበለጠ ሊጎላ እንደሚገባም አጽንኦት ሰጥተዋል።  

እስከአሁን በተከናወኑ ሥራዎች የተገኙ ስኬቶች ወደ ላቀ ደረጃ ለማሸጋገር መሥራት እንደሚገባም አስገንዝበዋል።

የብልጽግና ፓርቲ ሴቶች ክንፍ ፕሬዝዳንት ወይዘሮ ዘሃራ ዑመድ በውይይቱ ማጠቃለያ፤ የበጀት ዓመቱ የኢትዮጵያን ብሄራዊ ጥቅም ለማስከበር የሚደረገውን ጥረት ከዳር ለማድረስ የምንረባረብበት ነው ብለዋል፡፡   

 

የታላቁ ኢትዮጵያ ህዳሴ ግድብ ዐሻራችንን ያሳረፍንበት ትልቁ ውጤታችን ነው  በማለት ነው የገለጹት።

የአምስት ሚሊዮን ኮደርስ ኢኒሼቲቭ ኢትዮጵያ ወደ ዲጂታል ዓለም ለመሸጋገር ለምታደርገው ጥረት ከፍተኛ ፋይዳ እንዳለው ገልጸው፤ ኢኒሼቲቩ በተሟላ መልኩ እንዲተገበር ሚናችንን ማጠናከር አለብን ብለዋል፡፡  

የብሔራዊ መታወቂያ ጉዳይን አጀንዳ ማድረግ እና ግንዛቤ ማስፋት ላይ ይበልጥ መስራት አለብን ሲሉ አጽንኦት ሰጥተዋል፡፡ 

የብልጽግና ፓርቲ ሴቶች ክንፍ ምክትል ፕሬዝዳንትና የክንፉ ዋና ጽህፈት ቤት ሃላፊ ወይዘሮ መስከረም አበበ በበኩላቸው፤ በዘላቂ ሰላም ግንባታ ላይ ሴቶች የጎላ ሚና እንዲጫወቱ በትኩረት እንደሚሰራ ገልጸዋል፡፡

 

በሰላም ጉዳይ ውጤት እያመጣ ያለውን የሴቶች ተሳትፎ ይበልጥ ለማሳደግ እንደሚሰራ በመጥቀስ፤ ሴቶች በልማትና በፖለቲካ ተሳትፎ የተሻለ አስተዋጽኦ እንዲያበረክቱ ርብርብ እንደሚደረግም ጠቁመዋል፡፡   

የክንፉ ምክትል ፕሬዝዳንት ወይዘሮ ጠይባ ሀሰን፤ ክንፉ በየመስኩ የሴቶችን ተጠቃሚነት ለማሳደግ ያከናወናቸው ስራዎች ተጨባጭ ውጤት ማስገኘታቸውን አስረድተዋል፡፡   

 

የውጤቱን አፈጻጸም ወጥ ማድረግ እንደሚገባ ጠቁመው፤ ለዚህም በቅንጅት የመስራት ጉዳይ ትኩረት እንደሚሻ ተናግረዋል፡፡    

በውይይቱ ማጠቃለያም የተሻለ አፈጻጸም ላስመዘገቡ የክንፉ የክልልና ከተማ መስተዳደር ቅርንጫፍ ጽህፈት ቤቶች እውቅና ተሰጥቷል።