ጽዱ ኢትዮጵያን ለቀጣዩ ትውልድ ማስተላለፍ የሁሉም ዜጋ ኃላፊነት መሆን ይገባዋል

አዲስ አበባ፤ ነሐሴ 22/2017(ኢዜአ)፦ጽዱ ኢትዮጵያን ለቀጣዩ ትውልድ ማስተላለፍ የሁሉም ዜጋ ኃላፊነት መሆን እንደሚገባው የአካባቢ ጥበቃ ባለስልጣን ዋና ዳይሬክተር ኢንጅነር ለሊሴ ነሜ ገለጹ፡፡   

የደረቅ ቆሻሻ አያያዝና አወጋገድ አዋጅ ቁጥር 1383/2017 በህዝብ ተወካዮች ምክር ቤት መጽደቁ ይታወሳል።

የአካባቢ ጥበቃ ባለስልጣን አዋጁ ተግባራዊ በሚሆንበት አግባብ ዙሪያ ለባለድርሻ አካላት ስልጠና ሰጥቷል። 

የአካባቢ ጥበቃ ባለስልጣን ዋና ዳይሬክተር ኢንጅነር ለሊሴ ነሜ እንዳሉትም፤ አዋጁ ከያዛቸው አንኳር ጉዳዮች መካከል የፕላስቲክ ቆሻሻ አያያዝና የአወጋገድ ስርዓት ይገኝበታል፡፡ 

 

የፕላስቲክ ውጤቶች በመሬት ውስጥ ሳይበሰብሱ ለረጅም ጊዜ የሚቆዩ በመሆናቸው ለአካባቢ ብክለት መንስዔ፣ ለሰው ልጅ ጤና ደግሞ ጉዳት እየሆኑ መምጣታቸውን ተናግረዋል። 

በመሆኑም ኢትዮጵያ ከዓለም አቀፍ ህጎች ጋር የሚጣጣም እና ዘመኑን የሚዋጅ የደረቅ ቆሻሻ አያያዝና አወጋገድ አዋጅ ማዘጋጀቷን ጠቁመዋል። 

በአዋጁ መሠረት ለአንድ ጊዜ ብቻ ጥቅም ላይ የሚውሉ የፕላስቲክ ምርቶችን ወደ ሀገር ውስጥ ማስገባት፣ ማምረትና ለገበያ ማቅረብ እንደማይቻል አመልክተዋል። ይህም ከስድስት ወራት በኋላ በመላው ሀገሪቷ ተፈጻሚ እንደሚሆን ተናግረዋል።

በአካባቢም ሆነ በሰዎች ጤና ላይ ጉዳት የማያደርሱ ምርቶችን ለማቅረብ ከባለድርሻ አካላት ጋር በቅርበት እየተሰራ መሆኑን ጠቁመዋል።

የዛሬው ስልጠናም አዋጁ በአግባቡ እንዲፈጸም ባለድርሻ አካላት ግንዛቤ እንዲይዙ ለማድረግ ያለመ መሆኑን ተናግረዋል። 

በመድረኩ ጥናታዊ ጽሑፍ ያቀረቡት በአካባቢ ጥበቃ ባለስልጣን የከተማ ቆሻሻ አያያዝና አወጋገድ ክትትል ዴስክ ሃላፊ ዋሲሁን አለሙ፤ ጽዱና ለኑሮ ምቹ አካባቢ ለመፍጠር እየተከናወኑ የሚገኙ ስራዎች ውጤታማ መሆናቸውን አንስተዋል፡፡

 

የፕላስቲክ ቆሻሻ አያያዝና የአወጋገድ ስርዓት ዙሪያ ሁሉም ባለድርሻ አካላት በቂ ግንዛቤ በመያዝ የበኩላቸውን እንዲወጡም ጥሪ አቅርበዋል፡፡

 

የስልጠናው ተሳታፊ የአዲስ አበባ ከተማ አስተዳደር ፍትህ ቢሮ ምክትል ቢሮ ሃላፊ ተስፋዬ ደጀኔ፤ ስልጠናው አዋጁን ተፈጻሚ ለማድረግ የጋራ አቋምና አቅም እንድንይዝ የሚያደርግ ነው ብለዋል፡፡