‎የሲዳማ ክልል ምክር ቤት መደበኛ ጉባኤ አዋጆችን እና ሹመት በማፅደቅ ተጠናቀቀ

‎ሀዋሳ ፤  ሐምሌ 9/2017(ኢዜአ) ፡-  የሲዳማ ክልል ምክር ቤት 9ኛ መደበኛ ጉባኤውን የተለያዩ አዋጆችን እና  ሹመት በማፅደቅ አጠናቀቀ ።

ምክር ቤቱ የቀረበለትን የሲዳማ ብሔራዊ ክልላዊ መንግስት ሰራተኞች ረቂቅ አዋጅ በሙሉ ድምፅ አፅድቋል ።

‎አዋጁ የመንግስት መስሪያ ቤቶች የተሰጣቸውን ተልዕኮ በአግባቡ እንዲወጡ፣  በሰራተኞች መካከል ፍትሀዊና አዎንታዊ ውድድር እንዲኖር ሚና ያለው እንደሆነ ተገልጿል ።

 

‎በሌላ በኩል የሲዳማ ብሔራዊ ክልላዊ መንግስት አስፈፃሚ አካላት ማቋቋሚያ ፤ ሥልጣንና ተግባር መወሰኛ  ረቂቅ አዋጅ በሙሉ ድምፅ አፅድቋል ።

‎አዋጁ በሀገርና በክልል ደረጃ ያለውን ለውጥ መነሻ በማድረግ ተቋማት ለህብረተሰቡ የሚሰጡት አገልግሎቶች  ተደራሽና አካታች እንዲሆኑ ብሎም ተግባራቸውን በቅንጅት እንዲፈፅሙና ሀብትን በአግባቡ መጠቀም እንዲችሉ  ታሳቢ ያደረገ መሆኑ ተጠቅሷል ።

‎ምክር ቤቱ የሲዳማ ብሔራዊ ክልላዊ መንግስት ፖሊስ ጠቅላይ መምሪያ አደረጃጀት ሥልጣን እና ተግባር ለመወሰን የወጣ ረቂቅ አዋጅንም እንዲሁ በሙሉ ድምፅ አፅድቋል ።

ይህም ፖሊስ የተሰጠውን ሕገመንግስታዊ ተልዕኮውን በብቃት እንዲወጣ የሚያስችለው እንደሆነ ተጠቁሟል።

‎በተጨማሪም የሲዳማ ብሔራዊ ክልላዊ መንግስት የሀዋሳ ከተማ መዋቅራዊ የውስጥ አደረጃጀትን መልሶ ለማዋቀር የቀረበውን ረቂቅ አዋጅም አፅድቋል ።

‎በዚህም የሀዋሳ ከተማ በአምስት ክፍለ ከተሞችና  26 ቀበሌዎች የሚዋቀር መሆኑ ተመለክቷል።

ምክር ቤቱ የቀረቡለትን የተለያዩ ሹመቶችን አፅድቋል ።

በዚህም መሰረት ፡-

1/አቶ ቢኒያም ሰለሞንን የክልሉ ጠቅላይ ፍርድ ቤት የፍርድ ጉዳዮች ምክትል ፕሬዚዳንት ፣ 

2/አቶ ገነነ ሹኔን የክልሉ ጠቅላይ ፍርድ ቤት የአስተዳደር ጉዳዮች ምክትል ፕሬዚዳንት ፣

3/ አቶ ፍቅረየሱስ አሸናፊን የክልሉ የመሬት አስተዳደርና ኢንቨስትመንት ቢሮ ኃላፊ 

4/ አቶ ዳዊት ዳንጊሶን የክልሉ ሠላምና ፀጥታ ቢሮ ኃላፊ አድርጎ የሾመ ሲሆን፤  ተሿሚዎቹ  በምክር ቤቱ አባላት  ፊት ቀርበው ቃለ መሀላ ፈፅመዋል ።የምክር ቤቱ ጉባኤ መረሃ ግብሩን በዚሁ አጠናቋል።