አረንጓዴ አሻራ ለመጪው ትውልድ የተሻለች ሀገር የምንገነባበት የጋራ የልማት ስራችን ነው - ኢዜአ አማርኛ
አረንጓዴ አሻራ ለመጪው ትውልድ የተሻለች ሀገር የምንገነባበት የጋራ የልማት ስራችን ነው

አዲስ አበባ፤ ሐምሌ 1/2017(ኢዜአ)፦ አረንጓዴ አሻራ መርሃግብር ለመጪው ትውልድ የተሻለች ሀገር የምንገነባበት የጋራ የልማት ስራችን ነው ሲሉ የጠቅላይ ሚኒስትር ጽሕፈት ቤት አመራሮችና ሰራተኞች ገለጹ።
ጠቅላይ ሚኒስትር ዐቢይ አሕመድ( ዶ/ር) በየካ ተራራ በመገኘት ከጠቅላይ ሚኒስትር ጽሕፈት ቤት አመራር አባላት እና ሰራተኞች ጋር የአረንጓዴ አሻራቸውን አኑረዋል።
የአረንጓዴ አሻራ ችግኝ ተከላ መርሃ ግብሩም ቀደም ብሎ ለአፈርና ውሃ ጥበቃ ስራ በተዘጋጀ ስፍራ ላይ ተከናውኗል።
በመርሃ-ግብሩ ላይ የተሳተፉት የጽህፈት ቤቱ አመራሮችና ሰራተኞች ለኢዜአ በሰጡት አስተያየት እንደገለጹት ኢትዮጵያ በብዝሃ ዘርፍ እያከናወነች ባለው ተግባር ተጨባጭ ለውጥ ማምጣት ተችሏል።
የበለጸገች ኢትዮጵያን እውን ለማድረግ በሚደረገው ጥረት ውስጥ አረንጓዴ አሻራ ጉልህ አስተዋጽኦ እያበረከተ ስለመሆኑም አንስተዋል።
አረንጓዴ አሻራ መርሃግብር ለመጪው ትውልድ የተሻለች ሀገር የምንገነባበት የጋራ የልማት ስራችን ነው ሲሉም አስተያየት ሰጪዎቹ አክለዋል።
የጠቅላይ ሚኒስትሩ የወጣቶች እና ስፖርት አማካሪ ሚኒስትር ቀጄላ መርዳሳ እንዳሉት ኢትዮጵያ በአረንጓዴ አሻራ እየተከናወኑ ያሉ ተግባራት በዓለም አቀፍ ደረጃ ምሳሌ የሚያደርጋት ነው ብለዋል።
በጠቅላይ ሚኒስትር ዐቢይ አሕመድ (ዶ/ር) ሃሳብ አመንጪነት የተጀመረው የአረንጓዴ አሻራ መርሃ-ግብር በቢሊዮን የሚቆጠሩ ችግኞች እንዲተከሉ በማድረግ ለአረንጓዴ ልማት ጉልህ አስተዋጽኦ እያበረከተ መሆኑንም ተናግረዋል።
ተግባሩ ከሀገር ባለፈ ለአለም የአየር ንብረት ለውጥ መከላከል አስተዋጽኦ ማበርከት መቻሉን በተግባር ያረጋገጠ ነው ብለዋል።
የጠቅላይ ሚኒስትሩ የብሔራዊ ደህንነት አማካሪ ሚኒስትር ዴኤታ ቀንአ ያደታ (ዶ/ር) በበኩላቸው አረንጓዴ አሻራ የኢትዮጵያ የልማትና የብልጽግና ጉዞ አካል ነው ብለዋል።
መርሃ-ግብሩ በርካታ አላማዎችን ያነገበ ሲሆን በተለይም የአካባቢ ጥበቃ፣የአየር ንብረት ለውጥና በምግብ ራስን የመቻል አንዱ ማሳያ ተደርጎ ይወሰዳል፡፡
እንዲሁም ኢትዮጵያውያን በጋራ የሚሰባሰቡበትና አብሮነታቸውን የሚያጠናክሩበት መሆኑ ደግሞ ለአገረ መንግስት ግንባታው ጉልህ አስተዋጽኦ እያበረከተ ስለመሆኑም አንስተዋል።
በዚህ ሒደት አረንጓዴ አሻራ ለመጪው ትውልድ ምቹና እድገቷ የተረጋገጠች አገርን ለማስረከብ አይነተኛ ሚና እንዳለውም ገልጸዋል።
በጠቅላይ ሚኒስትር ጽህፈት ቤት የካቢኔ ጉዳዮች እና የሴክተሮች ክትትል ሚኒስትር ዴኤታ አክሊሉ ታደሰ እንዳሉት ባለፉት የለውጥ አመታት አረንጓዴ አሻራ ተከታታይነት ባለው መልኩ ተግባራዊ መደረጉ እንደ አገር ዘርፈ ብዙ ጠቀሜታን አስገኝቷል።
መርሃ-ግብሩን በአግባቡ በማስቀጠል ረገድ ዜጎች እያደረጉት ያለው ርብርብ ጉልህ አስተዋጽኦ ማበርከቱንም አብራርተዋል።
ኢትዮጵያ እያከናወነች ያለው አረንጓዴ አሻራ የተፈጥሮ ሃብትን በአግባቡ ጥቅም ላይ ለማዋልና ምቹ በማድረግ ረገድ ከራሷ አልፎ አህጉሪቷን በልማት ማስተሳሰር የሚያስችል ስለመሆኑም አንስተዋል።
አረንጓዴ አሻራ የቀጣዩ ትውልድ ጥቅምን ታሳቢ ያደረገና ለዘላቂ ልማት መረጋገጥ ጠቀሜታው የጎላ በመሆኑ ዜጎች በጀመሩት ልክ ተግባሩን አጠናክረው እንዲቀጥሉ ጥሪ አቅርበዋል።
የጠቅላይ ሚኒስትር ጽህፈት ቤት ፕሮጀክቶች አስተባባሪ ሚኒስትር ዴኤታ ብርሃኑ ተስፋዬ አረንጓዴ አሻራ በአገሪቱ የተጀመረውን ፈጣን የልማት እንቅስቃሴ ከግብ ለማድረስ ጉልህ አስተዋጽኦ እያበረከተ መሆኑንም ገልጸዋል።
የተሻለች ኢትዮጵያን ለትውልዱ ለማስተላለፍ የሚደረገውን ጥረት ከዳር ለማድረስ በርካታ ተግባራት እየተከናወኑ መሆኑን ገልጸው አረንጓዴ አሻራ አንዱ ማሳያ ስለመሆኑ አብራርተዋል።
በመሆኑም በአረንጓዴ አሻራ የተገኙ ስኬቶችን ለማስቀጠል ሁሉም ዜጋ የቤት ስራው አድርጎ በሃላፊነት ሊሰራ እንደሚገባ መልእክታቸውን አስተላልፈዋል።
በአረንጓዴ አሻራ መረሃ ግብሩ ላይ የተገኙት የኢትዮጵያ ደን ልማት ምክትል ዋና ዳይሬክተር አቶ ዳመነ ዳሮታ አረንጓዴ አሻራ በኢትዮጵያ በአካባቢ ጥበቃና በአየር ንብረት ለውጥ ዙሪያ የሚታይ ለውጥ ማምጣቱን ገልጸዋል።
እንዲሁም የግብርና ምርትና ምርታማነትን በመጨመር፣ የተፋሰስ ስራውን በማጠናከርና የተፈጥሮ ሃብትን ወደ ጥቅም በመቀየር ረገድ የራሱን አስተዋጽኦ እያበረከተ ይገኛል ብለዋል።
የኢትዮጵያን ብልጽግና ከሚያሳኩ ተግባራት አንዱ አረንጓዴ አሻራ መሆኑን የገለጹት ምክትል ዋና ዳይሬክተሩ መርሃ-ግብሩ በሚፈለገው መልኩ ተግባራዊ ሆኖ እንዲቀጥል ተቋሙ የሚጠበቅበትን ኃላፊነት እንደሚወጣ አረጋግጠዋል።