አሊባባ ግሎባል ኢኒሼቲቭ  አካዳሚውን በኢትዮጵያ ሊከፍት ነው

አዲስ አበባ፤ ጥቅምት 19/2017(ኢዜአ)፦  አሊባባ ግሎባል ኢንሼቲቭ  በኤሌክትሮኒክ ንግድ(E- commerce) ስልጠና መስጠት የሚያስችለውን ግሎባል አካዳሚ በኢትዮጵያ ሊከፍት ማቀዱን አስታወቀ።

ኢኒሼቲቩ ከዲጂታል ትራንስፎርሜሽን ኢትዮጵያ ማህበር ጋር በመተባበር በኤሌክትሮኒክ ንግድ ዘርፍ ከተሰማሩ ኢትዮጵያውያን ወጣቶች ጋር በአዲስ አበባ ውይይት አካሂዷል።

የአሊባባ ግሎባል ኢኒሼቲቭ ከፍተኛ አማካሪ ዳን ሊዩ በዚሁ ጊዜ እንደተናገሩት ኢኒሼቲቩ ስራ ፈጣሪዎችን ለማበረታታት ሙያዊ ስልጠናን የሚሰጥ ነው። 

 

በዓለም ላይ አካታች የንግድ ስርዓትን ለመፍጠር በተለያዩ አገራት በትብብር እየሰራ የሚገኝ ሲሆን በአፍሪካም ሙያዊ ስልጠናዎችን በመስጠት ላይ ነው ብለዋል።

ይህንን ሚናውን ለማጠናከርም በኢትዮጵያ ግሎባል አካዳሚውን በመክፈት በአፍሪካ በርካታ ስራ ፈጣሪዎችን ለማፍራት ማቀዱን ጠቁመዋል።

በኢትዮጵያ ከአገሪቱ ነባራዊ ሁኔታ ጋር የሚጣጣሙ መርሃ ግብሮች ላይ ትኩረት በማድረግ በኤሌክትሮኒክ ግብይት ክህሎትን ለማዳበር እንደሚሰራ ጨምረዋል።

 

የዲጂታል ትራንስፎርሜሽን ኢትዮጵያ ማህበር ምክትል ፕሬዝዳንት ባህሩ ዘይኑ አሊባባ ቀደም ሲል ለማህበሩ አባላት በቻይና እንዲሁም በኦን ላይን ስልጠና መስጠቱን አስታውሰዋል።

በቀጣይ እንግልትን በመቀነስ ለኢትዮጵያውያን እንዲሁም ለአፍሪካውያን ስልጠና ለመስጠት በኢትዮጵያ አካዳሚውን ለመክፈት ከስምምነት መደረሱን ተናግረዋል።

 

በኢትዮጵያ የቻይና ኤምባሲ የምጣኔ ሃብትና ንግድ ጉዳይ ሚኒስትር ካውንስለር ያንግ ይሃንግ በበኩላቸው ቻይና ኢትዮጵያ ዲጂታል ምጣኔ ሃብትን እውን ለማድረግ እያከናወነች ላለው ተግባር ድጋፏን አጠናክራ እንደምትቀጥል አረጋግጠዋል።

 

የኢኖቬሽንና ቴክኖሎጂ ሚኒስትር ዴኤታ ይሽሩን አለማየሁ(ዶ/ር) መንግስት ዲጂታል ምጣኔ ሃብትን እውን ለማድረግ በፖሊሲ፣ በዲጂታል ክህሎት፣ በመሰረተ ልማት ዘርፈ ብዙ ተግባራትን ማከናወኑን ገልጸዋል።

በዲጂታል ምጣኔ ሃብት ሽግግር ወጣቱን የስራ እድል ተጠቃሚ ለማድረግ አሊባባን ጨምሮ ከአለም አቀፍ ድርጅቶች ጋር የሚደረግ ትብብር ትልቅ ፋይዳ እንዳለው አንስተዋል።

መንግስት ዲጂታል ክህሎትን በማስፋፋት ስራ ፈጣሪነትን ለማበረታታት ተግባራዊ የተደረገው ኢትዮ-ኮደርስ ኢኒሼቲቭ ለዚህ አጋዥ መሆኑን ጠቁመዋል።

ኢትዮጵያውያን ወጣቶችም ከአሊባባና ሌሎች ዓለም አቀፍ ተቋማት የሚወስዷቸውን ልምዶች ወደ ተግባር በመቀየር ዲጂታል ምጣኔ ሃብትን እውን ለማድረግ የበኩላቸውን እንዲወጡ አስገንዝበዋል።

ኢኒሼቲቩ በቻይናው አሊባባ ዓለም አቀፍ የዲጂታል ንግድ ቡድን የዓለም የኤሌክትሮኒክ ንግድ አካል ሲሆን ሙያዊ ስልጠና በመስጠት ላይ ትኩረቱን ያደረገ ኢኒሼቲቭ ነው።