ንግድ ባንኩ ባለፉት ሦስት ወራት ከአስራ ሦስት ኩንታል በላይ ወርቅ መግዛቱን አስታወቀ

ሸረ እንዳስላሰ፤ጥቅምት 7 /2017 (ኢዜአ)፦ በኢትዮጵያ ንግድ ባንክ የሽሬ እንዳስላሴ ቅርንጫፍ ባለፉት ሶስት ወራት ከህጋዊ ወርቅ አዘዋዋሪዎች አስራ ሦስት ነጥብ አራት ኩንታል ወርቅ ግዢ መፈፀሙን አስታወቀ። 

የቅርንጫፍ ባንኩ ስራ አስኪያጅ አቶ ተኪኤ ግደይ ለኢዜአ እንደገለፁት፤ ባንኩ ከባህላዊ ወርቅ አምራቾች ግዢ የፈፀመው በሐምሌ፣ ነሐሴና መስከረም ነው። 

ብሔራዊ ባንክ ቀደም ሲል በነበረው የወርቅ ዋጋ ላይ የአስራ አምስት በመቶ ማሻሻያ ጭማሪ በማድረጉ ባለፉት ሶስት ወራት ከፍተኛ መጠን ያለው ወርቅ ግዢ መፈጸም እንደተቻለ ገልፀዋል። 

ባለፈው 2016 ዓ.ም ከመስከረም እስከ ሰኔ ባሉት ወራት ባንኩ የፈፀመው የወርቅ ግዢ 303 ሺህ 213 ነጥብ 20 ግራም እንደነበር ያስታወሱት የቅርንጫፍ ባንኩ ስራ አስኪያጅ፤ በያዝነው በጀት ዓመት የመጀመሪያ ሩብ ዓመት ባሉት ሶስት ወራት ግን  1 ሚሊዮን 349 ሺህ 32 ግራም የወርቅ ምርት ግዢ መፈፀሙን ተናግረዋል።

ቅርንጫፍ ባንኩ በአጠቃላይ ላከናወነው የወርቅ ግዢ በጥቅሉ ከአስራ ሰባት ቢሊዮን ብር በላይ ወጪ ማድረጉንም ገልፀዋል። 

 

የኢትዮጵያ ንግድ ባንክ የሽሬ እንዳስላሴ ቅርንጫፍ በኢትዮጵያ ብሔራዊ ባንክ ተወክሎ የወርቅ ግዢ ማዕከል በማቋቋም በክልል ደረጃ የወርቅ ግዢ በመፈፀም ላይ እንደሆነም የቅርንጫፍ ስራ አስኪያጁ ገልጸዋል።