ኢትዮጵያ ከሩሲያ ጋር በባህል ዘርፍ ያላትን ግንኙነት ለማጠናከር ትሰራለች - አምባሳደር ገነት ተሾመ

አዲስ አበባ፤ መስከረም 16/2017(ኢዜአ):- ኢትዮጵያ ከሩሲያ ጋር በባህል መስክ ያላትን የሁለትዮሽ ትብብር ለማጎልበት እንደምትሰራ በሩሲያ የኢትዮጵያ አምባሳደር ገነት ተሾመ ገለጹ።

አምባሳደር ገነት በሞስኮ የአማርኛ ቋንቋ ተማሪዎችና መምህራን በሌኒን ቤተ-መጻሕፍት የምሥራቅ የሥነ-ጽሁፍ ማዕከል ኢትዮጵያን በማስመልከት ያዘጋጁትን የስነ-ጽሁፍና የፎቶ ግራፍ ኤግዚቢሽን ጎብኝተዋል።

አምባሳደር ገነት ኢትዮጵያና ሩሲያ ያላቸውን ዘመናትን ያስቆጠረ ወዳጅነት እንዳላቸው አመልክተዋል።

በሞስኮ የአማርኛ ቋንቋ ትምህርታቸውን በመከታተል ላይ የሚገኙ ሩሲያዊያንና መምህራኖቻቸው የኢትዮጵያን ባሕልና ስነ-ጥበብ ለሩሲያ ዜጎች ለማስተዋወቅ የሚያደርጉትን ጥረት አድንቀዋል።

በሩሲያ የኢትዮጵያ ኤምባሲ ከትምህርት ተቋማቱ፣ ከማዕከሉና ከተማሪዎቹ ጋር በተለያዩ መርሃ ግብሮች በትብብር እንደሚሰራ አምባሳደሩ መግለጻቸውን ኢዜአ ከኤምባሲው ያገኘው መረጃ ያመለክታል።