በበጀት ዓመቱ ስምንት ወራት ለታላቁ የኢትዮጵያ ሕዳሴ ግድብ ግንባታ 932 ሚሊዮን ብር የሚጠጋ ገቢ ተሰብስቧል - የግድቡ ማስተባበሪያ ፕሮጀክት ጽህፈት ቤት

አዲስ አበባ፤ መጋቢት 17/2016(ኢዜአ)፦ በ2016 በጀት ዓመት ስምንት ወራት ለታላቁ የኢትዮጵያ ሕዳሴ ግድብ ግንባታ 932 ሚሊዮን ብር የሚጠጋ  ገቢ መሰብሰቡን የግድቡ ማስተባበሪያ ፕሮጀክት ጽህፈት ቤት አስታወቀ።

ለግድቡ ግንባታ የመሰረት ድንጋይ ከተጣለ ጊዜ አንስቶ በአጠቃላይ ከ19 ቢሊዮን ብር በላይ ገቢ መሰብሰቡንም ገልጿል።

የታላቁ የኢትዮጵያ ሕዳሴ ግድብ ፕሮጀክት ጽህፈት ቤት የህዝብ ግንኙነትና የሚዲያ ኮሙኒኬሽን  ዳይሬክተር ኃይሉ አብርሃም እንደገለፁት በተያዘው በጀት ዓመት ለግድቡ ግንባታ 2 ቢሊየን ብር በላይ ገቢ ለመሰብሰብ ታቅዶ እየተሰራ ነው።

በበጀት ዓመቱ ስምንት ወራት 931 ሚሊዮን 984 ሺህ 102 ብር ገቢ  መሰብሰቡን ጠቁመዋል።

ከዚህም ውስጥ ከ767 ሚሊዮን ብር በላይ የሚሆነው ከቦንድ ሽያጭና ስጦታ እንዲሁም ከ4 ነጥብ 6 ሚሊዮን ብር በላይ ከዳያስፖራው ድጋፍ መገኘቱን አመልክተዋል።

 

8100  አጭር የጽሁፍ መልዕክት እና "የኢትዮጵያ ነጻ አካውንት" በሚል ስያሜ ባለው የገቢ ማሰባሰቢያ አማራጭም ለሕዳሴ ግድቡ ግንባታ ገቢ መሰብሰቡን አመልክተዋል።

የታላቁ የሕዳሴ ግድብ ግንባታ መሰረት ድንጋይ ከተጣለበት ጊዜ አንስቶ እስከ አሁን ድረስ ከ19 ቢሊየን ብር በላይ ገቢ መሰብሰብ መቻሉን ነው የጠቆሙት።

የሕዳሴ ግድቡ በኢትዮጵያውያን አቅም ብቻ እየተገነባ ያለ ትልቅ አገራዊ ፕሮጀክት ነው ብለዋል።

የግድቡ ግንባታ መሰረት ድንጋይ የተጣለበት 13ኛ ዓመት ”በህብረት ችለናል ”በሚል መሪ ሀሳብ በተለያዩ መርሀ ግብሮች በመከበር ላይ እንደሆነም ነው ዳይሬክተሩ የገለጹት። 

ኢትዮጵያውያን የግድቡ ግንባታ እስኪጠናቀቅ እያደረጉት ያለውን ድጋፍ አጠናክረው እንዲቀጥሉ ጥሪ አቅርበዋል።

የታላቁ የኢትዮጵያ ሕዳሴ ግድብ ግንባታ መሰረት ድንጋይ መጋቢት 24 ቀን 2003 ዓ.ም መጣሉ ይታወቃል።