ጠቅላይ ሚኒስትር ዐቢይ አሕመድ(ዶ/ር) እና ፕሬዝዳንት ሉላ ደ ሲልቫ የሁለቱን ሀገራት ትብብር ወደላቀ ደረጃ ለማድረስ ያለመ ውይይት አድርገዋል

አዲስ አበባ፤ የካቲት 8/2016(ኢዜአ)፦ ጠቅላይ ሚኒስትር ዐቢይ አሕመድ(ዶ/ር) እና የብራዚል ፕሬዝዳንት ሉላ ደ ሲልቫ የሁለቱን ሀገራት ትብብር ወደላቀ ደረጃ ለማድረስ እና የፀና ወዳጅነትን የበለጠ ለማጠናከር በሚቻልበት ሁኔታ ለመፍጠር ያለመ ውይይት ማድረጋቸው ተገለጸ።

ጠቅላይ ሚኒስትር ዐቢይ አሕመድ(ዶ/ር) በጽሕፈት ቤታቸው በተካሄደ ይፋዊ የአቀባበል ስነስርዓት በኢትዮጵያ ጉብኝት በማድረግ ላይ የሚገኙትን የብራዝል ፕሬዝዳንት ሉላ ደ ሲልቫን ተቀብለው አነጋግረዋል።

ከስድስት አሰርት አመታት በላይ የቆየው የኢትዮጵያ እና የብራዚል ዲፕሎማሲያዊ ግንኙነት ዋና ማጠንጠኛው ንግድ ነው። 

ዛሬ ጠቅላይ ሚኒስትር ዐቢይ አሕመድ(ዶ/ር) እና ፕሬዝዳንት ሉላ ደ ሲልቫ የሁለቱን ሀገራት ትብብር ወደላቀ ደረጃ ለማድረስ እና የፀና ወዳጅነትን የበለጠ ለማጠናከር የሚቻልበትን ሁኔታ ለመፍጠር ያለመ ውይይት ማድረጋቸውም ተመላክቷል።
 
ለፕሬዝዳንት ሉላ ደ ሲልቫ ክብር ከተዘጋጀው የምሳ ግብዣ በኋላ ሁለቱ መሪዎች ለአካባቢ ጥበቃ ያላቸውን ቁርጠኝነት በሚያንፀባርቅ ብሎም ለቡና ባሕል ያላቸውን የጋራ አድናቆት በሚያሳይ ሁኔታ በአንድነት ፓርክ የቡና ችግኞችን ተክለዋል።