የንባብ ሳምንት መርሃ ግብር በአርባምንጭ ከተማ እየተካሄደ ነው

አርባምንጭ ፤ጥር 18 / 2016 (ኢዜአ)፡- የኢትዮጵያ ቤተ-መዛግብትና ቤተ-መጻሕፍት አገልግሎት ከአርባምንጭ ዩኒቨርሲቲ ጋር በመተባበር ያዘጋጀው የንባብ ሳምንት መርሃ ግብር በአርባምንጭ ከተማ እየተካሄደ ነው ።

"አርባምንጭ ታንብብ" በሚል መሪ ሀሳብ ለአርባ ምንጭና አካባቢዋ የተዘጋጀው መረሃ ግብሩ  ለአራት ቀናት እንደሚቆይ በስነ-ስርዓቱ ላይ ተገልጿል።

በቆይታው በተለያዩ  ርዕሰ ጉዳዮች ላይ የተፃፉ የመጻህፍት አውደ ርዕይና የመጻሕፍት ሽያጭ እንደሚከናወን ተመልክቷል። 

በመጻሕፍት፣ በሰነድና መዛግብት አስተዳደር ዙሪያ ከባለድርሻ አካላት እንዲሁም ከአርባምንጭ ዩኒቨርሲቲ ስነ-ጽሑፍ ክበብ ጋር ውይይቶች እንደሚደረጉም ይጠበቃል።

በተጨማሪም የስነ-ጽሑፍ መድረክ፣ በጋሞ ዞን ጨንቻ ማረሚያ ተቋም የመጻሕፍት ስጦታ እንዲሁም በተለያዩ ትምህርት ቤቶች የንባብ ክበባት ምስረታ፣ ግንዛቤ ማስጨበጫ መድረክ እንደሚኖርም ተመልክቷል።

በመረሃ ግብሩ ላይ የኢትዮጵያ ቤተ-መዛግብትና ቤተ-መጻሕፍት አገልግሎትና የአርባምንጭ ዩኒቨርሲቲ፣  የጋሞና አርባምንጭ ከተማ አመራር አባላት ፣እውቁ ደራሲ ዘነበ ወላና ሌሎችም  ደራሲያን እንዲሁም  ነዋሪዎች ተገኝተዋል።