የኪነ-ጥበብ ባለሙያዎች የፈጠራ ሥራዎቻቸው ለህዝብ እንዲያስተዋውቁ ድጋፍ ሊደረግላቸው ይገባል -ቱሪዝም ሚኒስቴር

አዲስ አበባ ግንቦት 25/2015 (ኢዜአ)፦የኪነ-ጥበብ ባለሙያዎች የፈጠራ ሥራዎቻቸውን በስፋት ለህዝብ እንዲያስተዋውቁ  ባለድርሻ አካላት ድጋፍ ሊያደርጉላቸው እንደሚገባ ቱሪዝም ሚኒስትር ዴኤታ አቶ ስለሺ ግርማ  ተናገሩ።

14ኛው ከተማ አቀፍ የኪነ-ጥበብ ፌስቲቫል በአዲስ አበባ ከተማ በተለያዩ ዐውደ ርዕይ እና ሥነ-ጥበባዊ ክዋኔዎች መቅረብ ጀምረዋል።  

የኪነ-ጥበብ መድረኩም "በሥነ- ጥበባት ሕብራዊ መልክ የተዋበች ኢትዮጵያ'' በሚል መሪ  ቃል  ከግንቦት 25 እስከ 27  ይካሄዳል።

ለሶስት ቀናት በሚቆየው በዚሁ ፌስቲቫል በዛሬው ውሎው የተለያዩ የሥነ-ጽሑፍ፣ የኪነ- ጥበብና ሌሎች መሰል ሥራዎች ቀርበውበታል።

ቱሪዝም ሚኒስትር ዴኤታ አቶ ስለሺ ግርማ በማስጀመሪያው ወቅት እንዳሉት በኪነ-ጥበብና ሥነ-ጥብብ ዘርፍ የተሰማሩ አካላት የፈጠራ ሥራዎቻቸውን ለሕዝብ እንዲያቀርቡም የኪነ-ጥበብ ፌስቲቫል ፋይዳቸው የጎላ ነው እንደሆነ ገልፀዋል።

 

ኪነ-ጥበብን ወደ ኢኮኖሚ አመንጪነት ለማሳደግ  ፌስቲቫሎችን በጥራት ማዘጋጀት አስፈላጊ ነው ብለዋል ። 

ስለሆነም ከተማ አቀፍ የኪነ-ጥበብ መድረኮች መዘጋጀታቸው በሀገር አቀፍ ደረጃ በመንግሥት የተያዘውን የቱሪዝም ልማት የሚደግፍና ኢኮኖሚያዊ አቅምን የሚያሳድግ ነው ብለዋል።

ይህንንም ለማጠናከር የኪነ-ጥበብ ባለሙያዎች የፈጠራ ሥራዎቻቸውን ለህዝብ እንዲያስተዋውቁ ባለድርሻ አካላት ድጋፍ ሊያደርጉላቸው ይገባል ብለዋል።

የአዲስ አበባ ባህል፣ ኪነ-ጥበብና ቱሪዝም ቢሮ የኪነ-ጥበብ ዘርፍ ምክትል ቢሮ ኃላፊ አቶ ሠርፀ ፍሬስብሐሃት በበኩላቸው መድረኩ በከተማው ያለውን የኪነ-ጥበብ ሀብቶች  አጉልቶ ለማሳየት የሚረዳ  ነው ብለዋል።

 

"ለጥበብ ሥራዎች የክወና መድረክ ከማግኘት በላይ ትልቁ አንቀሳቃሽ ኃይል የሕዝብ እይታና አድናቆት ነው" ያሉት ምክትል ቢሮው ኃላፊ ሥነ-ጥበባዊ ፈጠራዎችንና ፌስቲቫሎችን ማመቻቸት አስፈላጊ የሚሆነውም ለዚህ ነው ብለዋል። 

ከአዲስ አበባ ጋር ተመሳሳይ ተሞክሮዎችን የሚጋሩ የዓለም ከተሞች ዓመቱን ሙሉ በከፍተኛ ጥራት የሚዘጋጁትን የኪነ-ጥበብ ፌስቲቫል ዘርፉን ወደ ኢኮኖሚ አመንጪነት ለመቀየር ከፍተኛ እገዛ እንዳደረገላቸው ገልጸዋል።

የሚመለከታቸው ይህንን እንደ አገር በተሞክሮነት ሊወስዱት ይገባል ያሉ ሲሆን ባለሃብቶች በሚዘጋጁ ፌስቲቫሎች ላይ  በስፋት እንዲሰማሩ  ጥሪ አቅርበዋል።