በኢትዮጵያ ተጨማሪ 195 ሰዎች የኮሮናቫይረስ ተገኘባቸው

አዲስ አበባ ሰኔ 11/2012(ኢዜአ) በኢትዮጵያ ባለፉት 24 ሰዓታት በተደረገ 4 ሺህ 853 የላቦራቶሪ ምርምራ 195 ሰዎች የኮሮናቫይረስ ሲገኝባቸው፤ የሁለት ሰዎች ሕይወት አልፏል።

የጤና ሚኒስቴርና የኢትዮጵያ ህብረተሰብ ጤና ኢንስቲትዩት የኮሮናቫይረስ (ኮቪድ-19) በሽታ ምላሽ አሰጣጥን አስመልክቶ በጋራ በሚያወጡት ዕለታዊ መግለጫ እንዳስታወቁት፤ ቫይረሱ የተገኘባቸው 90 ወንድና 105 ሴት ሲሆኑ ከ 1 እስከ 85 ዓመት የእድሜ ክልል ውስጥ የሚገኙ ናቸው።

በኢትዮጵያ ቫይረሱ የተገኘባቸው ሰዎች ቁጥርም 3 ሺህ 954 ደርሷል።

ቫይረሱ በምርመራ የተገኘባቸው ሰዎች ሁሉም ኢትዮጵያውያን ናቸው።

ቫይረሱ በምርመራ ከተገኘባቸው ሰዎች መካከል 144 ከአዲስ አበባ፣ 12 ከአማራ ክልል፣ 12 ከትግራይ ክልል፣ 7 ከድሬዳዋ ከተማ አስተዳደር፣ 7 ከአፋር ክልል፣ 4 ከሶማሊ ክልል፣ 4 ከኦሮሚያ ክልል፣ 3 ከጋምቤላ ክልል እና 2 ሰዎች ከሀረሪ ክልል ናቸው። 

በተጨማሪም በሕክምና ማዕከል ውስጥ ሕክምና ሲደረግላቸው የነበሩ 2 ሰዎች ሕይወት ማለፉን መረጃው ያመለክታል።

በዚህም በኢትዮጵያ በኮሮናቫይረስ ሕይወታቸው ያለፉ ሰዎች ቁጥር 65 ደርሷል።

በትናንትናው ዕለት ከአዲስ አበባ 73፣ ከኦሮሚያ ክልል 5፣ ከአማራ ክልል 5 እና ከትግራይ ክልል 2 ሰዎች በአጠቃላይ 85 ሰዎች ያገገሙ ሲሆን በአጠቃላይ ያገገሙ ሰዎች ቁጥር 934 ደርሷል።

በጸና የታመሙ ሰዎች ቁጥር ደግሞ 27 ሆኗል።

በኢትዮጵያ እስካሁን 202 ሺህ 214 የላቦራቶሪ ምርመራ ተደርጓል።