የውጭ ጉዳይ ሚኒስቴር በዶ/ር ካትሪን ሐምሊን ሞት የተሰማውን ሃዘን ገለጸ

አዲስ አበባ፤ መጋቢት 10/2012(ኢዜአ) የኢፌዲሪ የውጭ ጉዳይ ሚኒስቴር በዶ/ር ካትሪን ሐምሊን ሞት የተሰማውን ጥልቅ ሃዘን ገለጸ።

ሚኒስቴሩ ለስራ ባልደረቦቻቸው፣ ለወዳጅ ዘመዶቻቸው እና ለቤተሰቦቻቸው እንዲሁም ለመላው የኢትዮጵያ ህዝብ መጽናናትን ተመኝቷል።

በትውልድ አውስትራሊያዊ የሆኑት ዶ/ር ካትሪን ሐምሊን ፌስቱላ ኢትዮጵያ የተባለ ግብረሰናይ ድርጅት በማቋቋም ከ60 ዓመት በላይ የፌስቱላ ህክምናን ሰጥተዋል።

በዚህ የበጎ አድራጎት ተግባራቸው በብዙ ሺህ የሚቆጠሩ ኢትዮጵያውያን ሴቶችን ከፊስቱላ ችግር ነጻ አውጥተዋል ብሏል።

ዶ/ር ካትሪን ሐምሊን በዚህ በጎ ተግባራቸው የኢትዮጵያ የክብር ዜግነት እና ከአዲስ አበባ ዩኒቨርሲቲ ደግሞ የክብር ዶክትሬት ተበርክቶላቸዋል፡፡

ዶ/ር ካትሪን ሐምሊን ለኢትዮጵያ ህዝብ ባበረከቱት በጎ ስራቸው ለዘላለም ሲታወሱ ይኖራሉ  ሲል  ሚኒስቴር መስሪያቤቱ  ሀዘኑን ገልጿል።