ወላይታ ሶዶ የደቡብ ክልል አራተኛውን የባህል ፌስቲቫል ታስተናግዳለች

ሶዶ ግንቦት 22/  2011 ወላይታ ሶዶ የደቡብ ብሄሮች፣ ብሄረሰቦችና ሕዝቦች ክልል አራተኛው የባህል ፌስቲቫል ልታስተናግድ ነው።

ፌስቲቫሉ ከወላይታ ዞን አስተዳደርና ከወላይታ ዩኒቨርሲቲ ጋር በመተባበር ይካሄዳል።

የክልሉ ባህል፣ ቱሪዝምና ስፖርት ቢሮ ኃላፊ ወይዘሮ ሰብለጸጋ አየለ እንዳስታወቁት  ከግንቦት 24 26/2011 በከተማዋ የሚካሄደው  ፌስቲቫል ባህላዊ ዕሴቶች ሠላምን፣ አብሮነትንና አገራዊ አንድነትን ለመጠበቅ እንደሚያስችል ታምኖበታል፡፡

በዚህም የክልሉ ብሄሮች፣ብሄረሰቦች ሕዝቦች ዕሴቶቹ  የነበራቸዉን ሚና በማስተዋወቅ ትስስሩን ለማጠናከር ታልሞ መዘጋጀቱን ገልጸዋል፡፡

ነባር ባህላዊ ዕሴቶች ሰላምንና አብሮነትን ለማቆየት የነበራቸዉን ሚና የሚያሳዩ ጽሁፎችና  የምርምር ስራዎች ቀርበው ውይይት እንደሚደረግባቸውና የልምዶች ልውውጥ እንደሚደረግ ኃላፊዋ አመልክተዋል፡፡

''ለዓለም የሚተርፉትን ባህላዊ ዕሴቶችን በአግባቡ በመጠቀም ከገጠመን ጊዜያዊ ችግር መውጣት ብቻ ሳይሆን፣ ይዘቱ ሳይሸረሸርና ሳይበረዝ በዘላቂነት ለትዉልድ እንዲተላለፍ ለማድረግ መንግሥት ትኩረት ሰጥቶ ይሰራል'' ብለዋል፡፡

የወላይታ ዞን ዋና አስተዳዳሪ አቶ ዳጋቶ ኩምቤ በበኩላቸዉ ፌስቲቫሉ የህዝቦችን አብሮነት ለማጠናከርና ባህላዊ ዕሴቶች ያላቸውን ፋይዳ ለማሳየት እንደሚረዳ ገልጸዋል፡፡

ዕሴቶቹ ለዕርቅና ይቅርታ የነበራቸው ሚና በተለይ ለወጣቱ የሚተዋወቁበት መድረክ እንደሚሆንም አስረድተዋል፡፡  

የዞኑ አስተዳደርም ከህዝቡና ከጸጥታ አካላት ጋር በመሆን እንግዶችን ለመቀበል፣ለማስተናገድና ባህሉን ለማስተዋወቅ ዝግጅት ማድረጉን ተናግረዋል፡፡

የተለያዩ ባህሎች በሚንጸባረቁበትና ተተኪ የሰው ኃይል የማፍራት ከፍተኛ ኃላፊነት የተጣለባቸው የትምህርት ተቋማት ተልዕኳቸዉን ለማሳካት ሠላም ወሳኝ ነው ያሉት ደግሞ የወላይታ ሶዶ ዩኒቨርሲቲ ፕሬዚዳንት ፕሮፈሰር ታከለ ታደሰ ናቸው፡፡

ዩኒቨርሲቲው በፈስቲቫሉ የጥናትና ምርምር ሥራዎች ለማቅረብ ዝግጅት መደረጉን ገልጸዋል።

ምሁራን  በዘርፉ ላለው ችግር ዘላቂ መፍትሄ ለማምጣት ኃላፊነታቸውን እንዲወጡ ፕሮፌሰር ታከለ ጠይቀዋል።

ሕዝቦች ለዘመናት አንድነታቸዉን ለመጠበቅ ሲጠቀሟቸዉ የነበሩ ባህላዊ ዕሴቶች ባላቸው አቅም ላይ በትኩረት ባለመሰራቱ አሁን ለሚስተዋሉ ችግሮች መንስዔ እንደሆነና በትውልዶች መካከል ክፍተት መፍጠሩን  አመልክተዋል፡፡

ዩኒቨርሲቲው በዚህ ረገድ የሚታዩ ችግሮችን ለማቃለል እየሰራ ነው ያሉት ፕሬዚዳንቱ፣  በወላይታና በሲዳማ ብሄሮች መካከል የተፈጠሩ አለመግባባቶችን ለማስወገድ በባህላዊና ዘመናዊ የግጭት አፈታት ዘዴዎች በመጠቀም ውጤት መገኘቱን በአብነትነት አቅርበዋል፡፡

ከወልቂጤና አርባ ምንጭ ዩኒቨርሲቲዎችና አጎራባች ዞኖች ጋር ባህላዊውንና ዘመናዊውን የግጭት አፈታት አቀናጅቶ በመጠቀም አብሮነትን ለማጠናከር የአገር ሽማግሌዎችን፣ የሃይማኖት ተቋማትና ወጣቶችን ያካተተ ፕሮጀክት ተቀርጾ እየተሰራበት ነው ብለዋል፡፡

በፌስቲቫሉ የክልሉ አመራሮች፣የአገር ሽማግሌዎችና የብሄር/ብሄረሰቦች ተወካዮች፤በክልሉ የሚገኙ ዩኒቨርሲቲዎች እንዲሁም  የፌዴራል መንግሥት የሥራ ኃላፊዎች ይሳተፉበታል፡፡

ፈስቲቫል ከዚህ ቀደም በሃዋሳና በዓርባ ምንጭ ከተሞች መካሄዱ ይታወሳል።