ጠቅላይ ሚኒስትር አብይ የሪፐብሊኩን የጥበቃ ኃይል አባላት ጎበኙ

አዲስ አበባ  ታህሳስ 14/2011  ጠቅላይ ሚኒስትር ዶክተር አብይ አህመድ ዛሬ የሪፐብሊኩን  የጥበቃ ኃይል አባላት ጎበኙ። የሪፐብሊኩ ጥበቃ ኃይል ማናቸውም ጥቃቶችን ለማስቆምና ለመመከት ያለውን ዝግጁነትና ሙሉ አቅሙን ለማሳየት በዛሬው ዕለት ትርዒት አቅርቧል። የሪፐብሊክ የጥበቃ ኃይል አባላት የመንግስት ባለስልጣኖችና ቤተሰቦቻቸውን የጥቃት ዓላማን አንግበው ከሚንቀሳቀሱ ኃይሎች ከሚሰነዘር ጠለፋና እንግልት ለመከላከልና ለማዳን መዘጋጀታቸውን የሚያሳይ ትርዒት አቅርበዋል፡፡ ኃይሉ የአገሪቱን ሕገ-መንግሥትና ህገ-መንግስታዊ ስርዓት ከማንኛውም ጥቃት ለመከላከል በአዲስ የተቋቋመ የደህንነት አካል መሆኑን ከጠቅላይ ሚኒስትር ጽህፈት ቤት ያገኘነው መረጃ አመልክቷል። የሪፐብሊክ የጥበቃ ኃይል በከፍተኛ የአመራር ስልጣን ላይ ያሉትን ኃላፊዎች ከማንኛውም ስጋት እና ጥቃቶች ለመጠበቅ አስፈላጊ የሆነውን ማንኛውንም ዘዴ መጠቀም ዋነኛ ተግባሩ እንደሆነ ተጠቁሟል። ባለፉት ስድስት ወራት ኃይሉ በሰለጠኑ የደህንነት ባለሙያዎች በመታገዝ ስልጠና እያገኘ እንደነበርና ተግባሩን ለማከናወን የሚያስችሉ ቁሳቁሶችን እያደራጀ መቆየቱ ተገልጿል።