ኢትዮጵያና ዴንማርክ የሁለትዮሽ ግንኙነታቸውን ለማጠናከር መከሩ

በተለይም በሃይል ግንባታ እና በአየር ንብረት ለውጥ ላይ የሚያደርጉት ትብብሮችን አንስተው በቀጣይነት በሚከናወኑ ተግባራትም ላይ ምክክር አድርገዋል፡፡ በውይይታቸውም በኒዮርክ ለአንድ ቀን የተካሄደውና ሁለቱ ሀገራት በጋራ ያዘጋጁት የሃይል ምንጭ ሽግግር ስብሰባ ውጤታማ በሆነ መልኩ መጠናቀቁ ለትብብራቸው ስኬታማነት አንድ ማሳያ ሆኖ ሊቀርብ እንደሚችልም መሪዎቹ ገልጸዋል፡፡ ዴንማርክ ለኢትዮጵያ በዋናነት በነፋስ ሃይል ግንባታዎች ላይ ከፍተኛ ድጋፍ በማድረግ ላይ ትገኛለች፡፡ በቅርቡ ለአሰላ የነፋስ ሀይል ግንባታ የሰጠችው የ200 ሚሊዮን እርዳታና ብድር ተጠቃሽ ነው፡፡ ከዚህ በተጨማሪም በተለያዩ የአቅም ግንባታ ፕሮግራሞች ድጋፍ ታደርጋለች፡፡