የኢሬቻ በዓል እሴቱን ጠብቆ በደመቀ መልኩ በአዲስ አበባ ከዛሬ ጀምሮ በድምቀት እየተከበረ ነው

299

መስከረም 18 ቀን 2015 (ኢዜአ)የኢሬቻ በዓል እሴቱን ጠብቆ በደመቀ መልኩ በአዲስ አበባ ከዛሬ ጀምሮ በድምቀት እየተከበረ መሆኑን የአዲስ አበባ ባህልና ቱሪዝም ቢሮ ገለፀ፡፡

የአዲስ አበባ ባህልና ቱሪዝም ቢሮ ሃላፊ ሃላፊ ዶክተር ሂሩት ካሳው በዛሬው እለት የ2015 ዓ.ም የኢሬቻ በዓል አከባበርን አስመልክቶ ለመገናኛ ብዙሃን በሰጡት ጋዜጣዊ መግለጫ እንዳሉት በዓሉ እሴቱን ጠብቆ በሰላምና በደመቀ ሁኔታ እንዲከበር የከተማ አስተዳደሩ የተለያዩ ሰፋፊ ዝግጅቶች እያከናወነ መሆኑን ገልፀዋል።

ዛሬ በሁሉም ክፍለ ከተሞች በሚገኙ ወረዳዎች የፓናል ውይይት መካሄዱን የገለጹት ዶክተር ሂሩት፤ለበዓሉ የሚያስፈልጉ አልባሳትን ጌጣጌጥ ምግቦችን ጨምሮ የበዓሉን ግብዓቶች ማህበረሰቡ በቀላሉ እንዲያገኝ የሚያስችል ባዛር መከፈቱንም ተናግረዋል።

May be an image of 4 people, people standing and outdoors

በነገውም እለት በሁሉም ክ/ከተሞች የፓናል ውይይት እንደሚካሄድ ጠቁመው፤ዓርብ ደግሞ እንደ ከተማ ከኦሮሚያ ጋር በመተባበር የፓናል ውይይት እንደሚካሄድም ገልፀዋል፡፡

እንደ ዶክተር ሂሩት ገለፃ ኢሬቻ የሃገር ውስጥ ቱሪዝምን ለማስፋፋት ትልቅ እድል የሚሰጥ መሆኑን ገልፀው መተኪያ የማይገኝለት በዓል ነው ብለዋል፡፡

በዓሉን ለማክበር ወደ ከተማዋ የሚገቡ እንግዶችን ለመቀበል በአምስቱም የከተማዋ መውጫ በሮች ዝግጅት መደረጉን የገለፁት ሃላፊዋ፤ይህም የሀገር ውስጥ ቱሪዝምን ለማስፋፋት ከፍተኛ አስተዋፅኦ እንዳለው ጠቁመዋል።

የኢሬቻ በዓል ማህበረሰባዊ፣ኢኮኖሚያዊና ፖለቲካዊ ፋይዳው ከፍተኛ መሆኑን ያነሱት ዶክተር ሂሩት፤የከተማዋ ነዋሪም በተለመደው የእንግዳ አቀባበል ባህላችን መሰረት የሰላም፤ የፍቅርና የአንድነት ተምሳሌት የሆነውን በዓል ማክበር ይገባልም ብለዋል።

ኢሬቻ በአለም የትምህርት፣ የሳይንስና የባህል ድርጅት የተመዘገበው የገዳ ስርዓት አካል መሆኑን በመገንዘብ እሴቱን ጠብቆ በደመቀ ሁኔታ ይከበራልም ነው ያሉት።

የዘንድሮው የኢሬቻ በዓል”ኢሬቻ ለሰላምና ለወንድማማችነት ” በሚል መሪ ሃሳብ ይከበራልም ሲሉም ገልጸዋል።

በዚሁ አጋጣሚ ህብረተሰቡ እና የፀጥታ ሃይሉ የመስቀል በዓል በሰላም ተጀምሮ እንዲጠናቀቅ ላበረከተው አስተዋፅኦ በአስተዳደሩ ስም ምስጋናቸውን አቅርበዋል፡፡