የብሄራዊ ስታዲየም የግንባታ ወጪ ዋጋ ማሻሻያ ሊደረግበት ነው

280

ሰኔ 22 ቀን 2014 (ኢዜአ)የብሄራዊ ስታዲየም የግንባታ ወጪ ዋጋ ማሻሻያ ሊደረግበት መሆኑን የባህልና ስፖርት ሚኒስትር ቀጀላ መርዳሳ ገለጹ።

በአዲስ አበባ እየተሰራ ያለው ብሄራዊ ስታዲየም /አደይ አበባ ስታዲየም/ በቻይናው ስቴት ኮንስትራክሽን ኢንጅነሪንግ ኮርፖሬሽን ግንባታው በመከናወን ላይ ይገኛል።

ግንባታው በታህሳስ 2008 ዓ.ም የተጀመረውና 62 ሺህ ሰዎችን በወንበር የመያዝ አቅም ያለው ስታዲየሙ የመጀመሪያ ምዕራፍ ግንባታ በ2 ነጥብ 4 ቢሊዮን ብር መጠናቀቁ ይታወቃል።

የሁለተኛው ምዕራፍ ግንባታ በ5 ነጥብ 57 ቢሊዮን ብር በሁለት ዓመት ከስድስት ወር ለማጠናቀቅ ታቅዶ በ2012 ዓ.ም ተጀምሮ የነበረ ቢሆንም እስካሁን 50 በመቶ እንኳን መከናወን አልቻለም።

May be an image of 7 people and outdoors

የዘገየበት ዋና ምክንያት ደግሞ ከክፍያ ስርዓት ጋር በተፈጠረ ችግርና በኮሮናቫይረስ መከሰት ሳቢያ መሆኑን የባህልና ስፖርት ሚኒስትሩ ቀጀላ መርዳሳ ይናገራሉ።

በዚህ ሳቢያ የዘገየው ስታዲየሙ የስራ ተቋራጩ (የቻይናው ስቴት ኮንስትራክሽ) የዋጋ ማሻሻያ እንዲደረግ መጠየቁን ገልጸዋል።

በተጨማሪም 40 በመቶ በውጭ ምንዛሬና 60 በመቶ በብር የነበረውን የክፍያ አፈፃፀም ስምምነት እንዲሻሻል መጠየቁንም ሚኒስትሩ ገልጸዋል።

የዓለምና የሀገር ውስጥ እቃዎችን መናር ተከትሎ መንግስት ማሻሻያውን ለማድረግ ዝግጁ ቢሆንም ተቋራጩ የጠየቀው ማሻሻያ ተጋኗል ብለዋል።

የግንባታ ሂደቱ መቀጠሉን የገለጹት ሚኒስትሩ በተቋራጩ የተጠየቀው የዋጋ ማማሻያ ከዚህ በፊት ለተሰራው ጭምር በመሆኑ እስካሁን ስምምነት ላይ አለመደረሱን አስታውሰው ውይይቶች እየተደረጉ መሆኑን ተናግረዋል።

በሁለተኛው ምዕራፍ ግንባታ ጣሪያ ማልበስ፣ ወንበር መግጠም፣ የሰው ሰራሽ ሀይቅ ግንባታ፣ ዘመናዊ የደህንነት ካሜራ መግጠም፣ ሳውንድ ሲስተም መዘርጋት፣ የፓርኪንግ ቦታዎች፣ የተጫዋቾች የመለማመጃ ሜዳ እና ሌሎችም ይገኙበታል።