የህግ ማስከበሩን ስራ ይበልጥ በማጠናከር የተረጋጋች አገር ለመገንባት የተጀመረው ስራ ይቀጥላል

ሰኔ 19/2022/ኢዜአ/ የህግ ማስከበሩን ስራ ይበልጥ በማጠናከር የተረጋጋች አገር ለመገንባት የተጀመረው ስራ የሚቀጥል መሆኑን የብልጽግና ፓርቲ ማዕከላዊ ኮሚቴ አባላት ተናገሩ፡፡

የብልጽግና ፓርቲ ማዕከላዊ ኮሚቴ ስብሰባውን በአዲስ  አበባ ያካሄደ ሲሆን በስብሰባው በኢትዮጵያ ፖለቲካ፣ ኢኮኖሚና የሰላም ጉዳዮች ዙሪያ ውይይት አድርጓል፡፡

የፓርቲው ማእከላዊ ኮሚቴ አባላት በስብሰባቸው ከሰሞኑን በምእራብ ወለጋና በጋምቤላ በሰላማዊ ዜጎች ላይ የደረሰውን ጥቃት አውግዘዋል።

በቀጣይ የጥቃቱን ተጎጂዎች መደገፍና ህግ የማስከበር ስራው ተጠናክሮ የሚቀጥል መሆኑን በውይይታቸው አጽኖት ሰጥተዋል።

አገራዊ ለውጡን ተከትሎ ጥቅማቸው የቀረባቸው የውስጥ ተላላኪዎች ከውጭ ጠላቶች ጋር ህብረት በመፍጠር በዜጎች ሰላምና ደህንነት ላይ አደጋ ለማድረስ በጋራ እየሰሩ መሆኑን ነው የፓርቲው ማዕከላዊ ኮሚቴ አባላት የገለጹት፡፡

የፓርቲው ማዕከላዊ ኮሚቴ አባል የሆኑት ኦሞድ ኡጁሉ፤  በለውጡ ጥቅማቸው የተነካባቸው አካላት በተቀናጀና በተናበበ መልኩ ሰለማዊ ዜጎች ላይ የተነጣጠረ ጥቃት በመፈጸም ለውጡን ለመቀልበስ እየሰሩ መሆኑን ተናግረዋል።

በዋናነት በንጹሃን ዜጎች ደም ወደ ስልጣን ለመምጣት የሚያደርጉት ጥረት መሆኑን ጠቅሰዋል።

በተመሳሳይ ሌላኛዋ የፓርቲው ማዕከላዊ ኮሚቴ አባል ቡዜና አልቃድር፤ የተዳከመችና የተበታተነች  ኢትዮጵያን ማየት የሚሹ የውጭ ጠላቶችና የውስጥ ተላላኪዎች ሰላማዊ ዜጎችን በማጥቃት ለውጡ ይዞት የመጣው ትልም አውን እንዳይሆን መስራታቸውን ያብራራሉ፡፡

የማእከላዊ ኮሚቴ አባላቱ አቶ አብዱረህማን እድሪስና አቶ ኦድሪን በድሪ፤ በማህበራዊ ሚዲያዎች የሚሰራጩ የጽንፈኝነትና የአክራሪነት አዝማሚያዎች በዜጎች ሰላምና ደህንነት ላይ እንቅፋት መፍጠራቸውን አንስተዋል፡፡

የውጭ ጠላቶች እና የውስጥ ተላላኪዎች የጽንፈኝነትና የአክራሪነት አካሄዶች ይበልጥ እንዲስፋፉ ተቀናጅተው በመስራት በሰላማዊ ዜጎች ህይወት ላይ አደጋ እንዲፈጠር ማድረጋቸውንም ነው ያነሱት፡፡

በዚህም ዜጎች የሰላምና ደህንነት ጥያቄ በስፋት ሲያነሱ መቆየታቸውን ጠቅሰው መንግስት በተቀናጀ መልኩ የህግ ማስከበር ስራ በማከናወን ለዜጎች ጥያቄ ምላሽ እየሰጠ መሆኑን ገልጸዋል፡፡

ማንም ቢሆን ከህግ በታች ነው የሚሉት አቶ ኦሞድ፤ መንግስት የህግ የበላይነትን በማስከበር የተረጋጋች አገር ለመገንባት የጀመረውን ጥረት አጠናክሮ ይቀጥላል ብለዋል፡፡

ወይዘሮ ቡዜና አልቃድር በበኩላቸው ህግ የማስከበሩ ስራ የመንግስት የቀጣይ ዋነኛ የትኩረት አቅጣጫ መሆኑን ይናገራሉ።

በተመሳሳይ አቶ አብዱረህማን እድሪስና አቶ ኦድሪን በድሪ ከህብረተሰቡ ጋር በመቀናጀት ህግ የማስከበሩ ስራ ተጠናክሮ እንደሚቀጥል አረጋግጠዋል፡፡

የፓርቲው ማእከላዊ ኮሚቴም የዜጎችን ሰላምና ደህንነት የማስጠበቁ ስራ በተቀናጀ መልኩ እንዲከናወን አቅጣጫ ማስቀመጡን ገልጸው፤ ከዚህ አኳያ ኃላፊነታቸውን የማይወጡ አመራሮች ተጠያቂ ይሆናሉ ብለዋል።