የጎርፍ አደጋ ስጋት ባለባቸው አካባቢዎች የሚገኙ ነዋሪዎች አስፈላጊውን ጥንቃቄ እንዲያደርጉ ከተማ አስተዳደሩ አሳሰበ

4

ሰኔ 4 ቀን 2014 (ኢዜአ) የአዲስ አበባ ከተማ አስተዳደር በዘንድሮው ክረምት የጎርፍ አደጋ ስጋት ያለባቸው አካባቢዎች የሚገኙ ነዋሪዎች ከወዲሁ አስፈላጊውን ጥንቃቄ ሁሉ እንዲያደርጉ ጥሪ አቅርቧል፡፡

የአዲስ አበባ ከተማ አስተዳደር ኮሙኒኬሽን ቢሮ ጉዳዩን አስመልክቶ ባወጣው መግለጫ አዲስ አበባ ከፈጣን ልማት፣ ከዘላቂ የዕድገትና የከተማ ማስዋብ እንቅስቃሴዎች በተጓዳኝ ለልዩ ልዩ የተፈጥሮና ሰው ሰራሽ አደጋዎች ስጋት የተጋለጠች ከተማ መሆኗን አንስቷል፡፡

ከዚህ ጋር ተያይዞ ቢሮው አስፈላጊው ሁሉ ቅድመ ጥንቃቄ የወቅቶች መለዋወጥና የአየር ንብረት መዛባትን ተከትለው የሚከሰቱ አደጋዎችን ለመቀልበስ በተቀናጀ መልኩ መደረግ አለበት ብሎ እንደሚያምን እና የድርሻውን ኃላፊነት ከሚመለከታቸው ሁሉ ጋር እንደሚወጣ አሳውቋል ።

ባለፉት ዓመታት ጐርፍ፣ የመሬት መንሸራተት፣ የቆሻሻ መደርመስና መሰል አደጋዎች በከተማዋ ማጋጠማቸውን ተከትሎ የከፋ ሰብዓዊና ቁሳዊ ጉዳት መድረሱን መግለጫው አስታውሷል፡፡

ባሳለፍነው ዓመት የክረምት ወራት በመዲናዋ የወንዝ ዳርቻዎች፣ በተዳፋት ቦታዎች፣ በረባዳማ አካባቢዎች የሚኖሩ ዜጎች የጎርፍ አደጋና የመሬት መንሸራተት ከፍተኛ ስጋት ያለባቸው በመሆኑ የከተማ አስተዳደሩ አስፈላጊውን ሁሉ ቅድመ ጥንቃቄ የአካባቢው ነዋሪዎችና የሚመለከታቸው አካላት በጣምራ እንዲያረጉ ሲያሳስብ መቆየቱም ተጠቁሟል፡፡

ካለፉት ጊዚያት ልምድ በመውሰድ ከተማ አስተዳደሩ በመጪው የክረምት ወቅት መሠል አደጋ በሰው ህይወትና ንብረት ላይ እንዳያጋጥም አስቀድሞ ለመከላከል እንዲቻል ከሚመለከታቸው ተቋማት የባለሙያዎች ቡድን በማዋቀር የጎርፍ አደጋ ስጋት ያለባቸውን አካባቢዎች የመለየት ሥራ በስፋት ማከናወኑ ተመላክቷል፡፡

በሁሉም ክ/ከተሞችና ወረዳዎች በባለሙያዎች በተደረገ የጥናት ውጤት መሰረት 161 አካባቢዎች በተለያየ ደረጃ የሚገለፅ የአደጋ ስጋት ያለባቸው ሲሆኑ ከእነዚህም መካከል ደግሞ 61 አካባቢዎች ከፍተኛ የጎርፍ አደጋ ስጋት ያለባቸው እና ተጋላጭ አካባቢዎች መሆናቸው በተደረገው ጥናት መለየቱ ነው የተገለጸው፡፡

በጥናቱ ምክረ ሀሳብ መሰረት ከተማ አስተዳደሩ አስፈላጊውን የሰው ኃይልና በጀት በመደብ ስጋቱን ለማቃለል የሚረዱ የቅድመ ጥንቃቄ ተግባራትን አስቀድሞ ማከናወን መጀመሩም ተመላክቷል፡፡

ከተማ አስተዳደሩ በልዩ ልዩ የህብረተሰብ ክፍሎች ህይወትና ንብረትሊከሰት የሚችልን የትኛውንም ድንገተኛ አደጋ ታሳቢ በማድረግ ፣ብሎም ስጋት አለባቸው ተብለው በተለዩ አካባቢዎች በሚገኙ ልዩ ልዩ ተቋማትና በልማት አውታሮች ላይ ጉዳት እንዳያጋጥም ኢንዲሁም በልዩ ልዩ አደጋዎች ምክንያት በአጠቃላይ በሀገራችን ኢኮኖሚ ላይ ሊደርስ የሚችልን ጉዳት ታሳቢ በማድረግ የሚመለከታቸውን ተቋማት በማስተባበር አስቀድሞ በተደረገው ጥናት የተሰጡ ምክረ ሃሳቦችን ዋቢ በማድረግ በአስተማማኝ ሁኔታ ስጋቶችን ለመቅረፍ እንዲቻል በርካታ ተግባራት በሚከተሉት አካባቢዎች በስፋት እየተተገበሩ እንደሚገኙ ተጠቁሟል፡፡

በዚህ መሰረትም በወንዝ ዳርቻ ወይም አቅራቢያ የሚኖሩ የሕብረተሰብ ክፍሎችን የማንሳት እንቅስቃሴ ፣ በወንዞች ዳርቻ የአፈር መንሸራተትና የጎርፍ አደጋን ለመከላከል የሚያስችሉ ግንባታዎችን የማከናወን ሥራ፣ በወንዞች ውስጥ የተጣሉ ቆሻሻዎችን በማንሳት የማጽዳት እንቅስቃሴ፣ የወንዝ ዳርቻዎችን በአገር በቀል እጽዋት የመሸፈንና ፍሳሽ ማስወገጃ ቱቦዎችን የማፅዳት እንቅስቃሴ፣ የወንዝ ዳርቻዎችን ወሰን ማስከበርና የአደጋ ስጋትን ለመቀነስ የሚያስችሉ በርካታ የቅድመ መከላከል ተግባራት በቅንጅት እየተከናወኑ መሆናቸውን ቢሮው በመግለጫው አመላክቷል፡፡