ኢትዮጵያ የውስጥ አንድነቷን አስጠብቃ ለቀጣናው ትስስር መስራት አለባት … አምባሳደር ጀምስ ፒ ሞርጋን

654

አዲስ አበባ፤ መጋቢት 26/2013(ኢዜአ)”ኢትዮጵያ የውስጥ አንድነቷን አስጠብቃ ለቀጣናው ትስስር መስራት ይጠበቅባታል” ሲሉ በኢትዮጵያ የደቡብ ሱዳን አምባሳደር ጀምስ ፒ ሞርጋን ተናገሩ።

 አምባሳደር ጀምስ በኢትዮጵያ ወቅታዊ ሁኔታና የቀጣናው አገራት ሁኔታን በማስመልከት ከኢዜአ ጋር ባደረጉት ቆይታ እንዳሉት ኢትዮጵያ በአፍሪካ ቀንድ ቀጣና ተስፋ የሚጣልባትና ለዚህም ተግታ ስትሰራ የቆየች አገር ናት።

ቀጣናው በርካታ ውስብስብ ችግሮች ያሉበትና ብዙ የመልማት ፍላጎትና እድል ያለው አካባቢ ነው  ያሉት አምባሳደሩ፤ ይህን በመሰለ ክፍለ አህጉር ደግሞ እንደ ኢትዮጵያ ያሉ ጠንካራ አገራት ቀጣናውን የማስተሳሰር ሚናቸው ትልቅ ነው ብለዋል።

በመሆኑም ኢትዮጵያ የውስጥ አንድነቷን ከማስጠበቅ አልፋ ለቀጣናዊ ትስስር አብርክቶዋን ማጠናከር አለባት ብለዋል አምባሳደር ጀምስ።

እንደ አምባሳደሩ ገለጻ የአፍሪካ ቀንድ አገራትም ይሁኑ ሌሎች አካላት ኢትዮጵያ ላለችበት ሁኔታ መፍትሄ እንድትሰጥ እድል መስጠት ያስፈልጋል።

ከ10 ዓመታት በላይ የምስራቅ አፍሪካ የልማት በይነ መንግስታት (ኢጋድ)ን በበላይነት የመራችው ኢትዮጵያ ለራሷ ችግር መላ አታጣም  በማለትም ጠቅሰዋል። 

በዚሁ መሰረት ጎረቤት አገራት የኢትዮጵያ የፖለቲካ ተዋናዮች ከመንግስት ጋር በቅርበት እንዲሰሩ የሰላም ጥሪ ማቅረብ አለባቸው ነው ያሉት።

ይህ ካልሆነ የኢትዮጵያ ችግር የእርሷ ብቻ ሳይሆን መዘዙ ለጎረቤት አገራትም መትረፉ የማይቀር ነው ይላሉ አምባሳደር ጀምስ።

ይህም ሆኖ ኢትዮጵያ ጥንታዊት አገር እንደመሆኗ የውስጥ ችግሮቿን የምትፈታበት የዳበረ ልምድ ያላት አገር መሆኗን በመመስከር፤ በዚህ ወቅም የገጠማትን ጉዳይ በአግባቡ መወጣት እንደምትችል ሙሉ እምነት እንዳለቸውም ጨምረው ገልጸዋል።

አምባሳደር ጀምስ ኢትዮጵያ ከኮሪያ ጦርነት ጀምሮ ለዓለም ሰላም ዘብ ስትቆም መቆየቷንም አስታውሰዋል።

ኢትዮጵያ ከጎረቤቶቿም ሆነ ከአፍሪካ ቀንድ አገራት ጋር መልካም ግንኙነት ያላት አገር መሆኗ የሚታወቅ ነው።