Haaromee

 Haaromeen mala Mootummaa Naannoo Oromiyaatiin akka ce'umsaa hawaasa Baadiyyaa fi Magaalaa gara sirna oomishtummaa ammayyaatti ceesisuuf diriirfameedha.

 Bakka humnoonni oomishtummaa walitti dhufanii sirna haaraa jalatti qindaa'anidha.

Yaadni Haaromee bu'uuraan hawaasa oomishtummaa irratti hundaa'e ijaaruu, baadiyyaa fi magaalaa walitti hidhanii guddina dinagdee itti fufiinsa qabu uumuufi qonnaan bulaafi horsiisee bulaa gara oomisha gabaa irratti dorgomuu danda'utti ceesisuudha.

Haaromeen  baadiyaa dameelee misooma baadiyaa  Lageen, daandii qonnaa fi  eegumsa  naannoo  keessatti gahee guddaa qaba.

Hawaasni  baadiyaa sochii hawaasummaa fi dinagdeesa gaggeeffachuuf  bu’uuraaleen misoomaa armaan olitti  eeraman  sadarkaa fi qulqullinaa isaanii eeggachuun  tajaajila hawaasaaf kennuun murteessaa dha.

 

Faayidaaleen ijoo haaromee baadiyaa keessaa muraasni:

1. Faayidaa Dinagdee fi Qonnaa

Gabaa waliin Wal-qunnamsiisuu: Daandiilee  baadiyaa haaromsuudhaan omisha qonnaan bultootaa ammayyeessuun gara gabaatiif haala salphaan akka dhiyaatu taasisa.

Badhaadhina Qonnaan Bulaa: Omishaa fi omishtummaa qonnaan bulaa mirkaneessuuf  daandiin baadiyaa fi bu’uuraaleen  misoomaa biroon murteessaa dha. Kanaafis  koriidarri  baadiyaa  omishtummaa  qonnaan bulaa guddisuun   badaadhina mirkaneessuuf qooda olaanaa qaba.

Carraa Hojii Uumuu: Haaromsa koriideraa keessatti hojiilee ijaarsaa, daandiilee, bishaanii fi misooma naannoo irratti dargaggoota baadiyaatiif carraa hojii uuma.

Carraa hojii bal'isuu, galii uummataa guddisuu, invastimantii fi indastirii babal'isuun hawaasa of danda'ee fi badhaadhina hunda galeessa ijaaruuf hojii gumaacha.

 

2. Faayidaa Naannoo fi Uumamaa

Biyyee fi Bishaan Eeguu: biyyeen akka hin dhiqamneef  mukeen faayidaa adda addaa qaban dhaabuun  naannoo kunuunsuu fi miidhagsuu keessaatti faayidaa olnaa qaba.

Haala Qilleensaa Tasgabeessuu: Misooma Koriidera Magariisaa wajjin walqabachuudhaan jijjiirama qilleensaa ittisuuf gumaacha guddaa taha.

Haroowwaanii  fi Laga Eeguu: Lagaa fi malkaa ammayyeessuu fi kunuunsuudhaan balfi  akka keessa hin gallee fi bishaan qulqulluun akka jiraatu taasisa.

3. Faayidaa Hawaasummaa fi Tajaajila Bu'uuraa

Tajaajila Hawasaa Salphaatti Argachuu: Manni barumsaa, tajaajilli fayyaa, fi gabaan salphaatti akka dhaqqabamu taasisa.

Bishaan Qulqulluu Argachuuf: Madda bishaan baadiyaa Haaromsuun dhibeewwan bishaan irraa dhufan hir'isa.

Magaalaa fi Baadiyaa Wal-qunnamsiisuu: Garaagarummaa tajaajila bu'uuraa kan magaalaa fi baadiyaa gidduu jiru  akka dhiphisu odeeffannoon Biiroo Koomunikeeshinii Oromiyaarraa argame mul’isa.