Sagantaa duula dhaabbii Biqiltuu Ashaaraa Magariisaa guyyaa tokkoo irratti hirmaachuun ashaaraa keenya kaa’uuf qophoofneerra – Jiraattota

Adoolessa 24/2018 (ENA): Jiraattoonni Naannoo Hararii Sagantaa duula dhaabbii biqiltuu Ashaaraa Magarisaa guyyaa tokkoo gaggeeffamu irratti hirmaachuudhaan ashaaraa isaanii kaa'uuf qophaa'uu isaanii ibsaniiru.

Sagantaa duula dhaabbii biqiltuu ashaaraa Magarisaa biyyaalessaa guyyaa tokkoo irratti wiixata dhufu gaggeeffamuun biqiltuu miiliyoona 800 dhaabuuf karoorfameera.

Sagantaa dhaabbii biqiltuu magarisaa guyyaa tokkoo Naannoo Harariitti gaggeeffamuuf biqiltuuwwan faayidaa adda addaa qaban dhaabbiif qophaa'aniiru.

Jiraattoonni naannichaa ENA’f yaada kennan akka ibsanitti, Sagantaan Ashaaraa Magariisaa faayidaa hedduu qabu hubachuudhaan, sagantaa dhaabbii biqiltuu Ashaaraa Magarisaa guyyaa tokkoorratti hirmaachuudhaan ashaaraa isaanii kaa'uuf qophaa'uu isaanii dubbataniiru.

Jiraattota keessaa Salamoon Fiqiree waggoottan darban sagantaa Ashaaraa Magariisaan lafti miidhame deebi’ee akka dandamatuu fi omishtummaan akka guddatuuf gahee isaanii ba'achuu isaanii ibsaniiru.

Hojicha itti fufsiisuunis sagantaa dhaabbii biqiltuu Ashaaraa Magarisaa guyyaa tokkoo kan bara kanaa irratti kaka'umsaan hirmaachuuf qophaa'uu isaanii dubbataniiru.

Waggaa waggaan sagantaa dhaabbii biqiltuurratti hirmaachuun dhiibbaa jijjiirama qilleensaa hir'isuufi wabii nyaataa mirkaneessuuf tattaaffii taasifamu keessatti gahee ishee ba'achaa jiraachuu Masaay Silashii ibsiteetti.

Sagantaa dhaabbii Biqiltuu Ashaaraa Magarisaa guyyaa tokkoorratti hirmaachuu qofa osoo hin taane, kunuunsuudhaan bu'aaf akka ga'an hojjechuuf qophaa'uu ishee ibsiteerti.

Jiraataan Magaalaa biroon Obbo Abdullaaziiz Kadiir waggoota torban darban sagantaa dhaabbii biqiltuu Ashaaraa Magariisaa irratti biqiltuu dhaabuudhaan hirmaachaa turuu isaanii yaadachiisaniiru.

Sagantaa dhaabbii biqiltuu Ashaaraa Magarisaa guyyaa tokkoo kan baranaarratti hirmaachuuf qophaa'uu isaaniis dubbataniiru.

Waggaa waggaan biqiltuu dhaabuu qofa utuu hin taane kunuunsaafi eegumsa barbaachisaa taasisaa turuu isaanii kan dubbatan immoo Saabiit Xahaati.

Jiraataan Magaalattii biqiltuu dhaabuu aadaa godhachaa dhufuu isaanii eeranii, sagantaa dhaabbii biqiltuu Ashaaraa Magarisaa guyyaa tokkootiifis qophaa'uu isaanii dubbataniiru.