Itiyoophiyaa fi Mooriishiyes Carraawwan bal’aa hariiroosaanii itti cimsuu danda’an jiru — Pirezidantii Moorishiyes Dihaaraambiir Gookul

Adoolessa 10/2018 (ENA): Moorishiyeesii fi Itiyoophiyaan dameewwan fayyaa fi barnootaa dabalatee dameewwan haaraa hariiroo gam-lamee isaanii itti gabbisuu danda’an akka jiran Pirezidantiin biyyattii Dihaaraambir Gookul ibsaniiru.

Daandii Qilleensa Itiyoophiyaa Adoolessa 5 bara 2018 irraa eegalee Finfinnee fi Poorti Luwiis gidduutti torbanitti si’a sadii balallii kallattii imaltootaa jalqabsiiseera.

Pirezidantiin Moorishiyes Dihaaraambir Gookul jalqabamuu balallii kallattii kanaan walqabatee miidiyaa “Pulse of Africa Media”(POA)tiif akka ibsanitti; hariiroon qilleensaa cimaan dandeettii dinagdee Afriikaa guddisuuf baay’ee murteessaadha.

Daandiin qilleensichaa balallii Moorishiyesitti eegale kun biyyoota lamaan gidduutti dameewwan Tuurizimii, Daldalaa, Investimantii fi misooma humna namaatiin carraawwan haaraa akka uumu eeraniiru.

Qunnamtiin qilleensaa cimaan dandeettii dinagdee guutuu Afriikaatti fayyadamuuf murteessaa ta’uu ibsuun, balallichi eegaluunsaa abjuu Gamtaan Afriikaa Ardii caalaatti qindoomte uumuuf qabate kan saffisiisudha jedhaniiru.

Qunnamtiin qilleensaa cimaan dandeettii guutuu dinagdee Afriikaatti fayyadamuuf murteessaa ta’uu isaas dabalanii ibsaniiru.

Rakkoolee gurguddoo ardii Afriikaatti argaman keessaa tokko hanqina qunnamtii ta’uu kan ibsan Pirezidantichi; Moorishiyes Itiyoophiyaa waliin qunnamsiisuun, Afriikaan gufuu yeroo dheeraa kanaan dura ture kana furuuf tarkaanfii qabatamaa fudhachaa jiraachuu ishee kan agarsiisudha jedhaniiru.

Balallii haaraan kun geejjiba imaltootaa bira darbee, hariiroo yeroo dheeraa biyyoota lamaan gidduu jiru cimsuuf dandeettii guddaa akka qabus ibsaniiru.

Moorishiyes abbootii qabeenyaa fi dhaabbilee daldalaa addunyaatiif balbala seensa Afriikaa ijoo ta’uuf hojjachaa akka jirtu eeruun; abjuu kana milkeessuuf qunnamtii qilleensaa cimaa uumuun hojii furtuudha jedhaniiru.

Dhaqqabummaan balallii qilleensaa bal’aan Daandiin Qilleensa Itiyoophiyaa Afriikaa fi addunyaa keessatti qabu, yaa’insa daldalaa fi investimantii biyyoota lamaan gidduu jiru haala olaanaan akka guddisus eeraniiru.

Geejjibni meeshalee (kaargoo) gufuuwwan dhiyeessii ijoo Afriikaa keessaa tokko ta’uu eeruun, hariiroon haaraa kun daddabarsa meeshalee ardicha keessaa fooyyessuuf abdii haaraa akka kennu dubbataniiru.

Waliin hojjechuun keenya rakkoo dhiyeessii fi daddabarsa meeshalee kana furuuf carraa bal’aa nuuf uuma jechuun ibsaniiru.

Dhaabbanni Leenjii Aviyeeshinii Itiyoophiyaa dargaggoota Moorishiyesiif dabalatee dameewwan ogummaa Aviyeeshinii birootiin ijaarsa dandeettii fi carraa leenjii olaanaa akka baanu eeraniiru.

Gara fuulduraattis dameewwan Barnootaa, Fayyaa fi dinagdee cuquliisaa (Blue Economy) keessatti beekumsa, teeknoolojii fi muuxannoo wal-jijjiiruun waliin hojjachuuf carraan bal’aan akka jiru ibsaniiru.

Daandiin Qilleensa Itiyoophiyaa Adoolessa 5bara 2018 irraa eegalee gara Moorishiyeesitti torbanitti guyyoota sadii balallii imaltoota jalqabuunsaa ni yaadatama.

Kunis Imaltoonni salphaatti gara Afriikaa, Awurooppaa, Eeshiyaa, Giddu-galeessa Bahaa fi Ameerikaatti akka imalan gochuun qunnamtii Ardichaa akka cimsu ibsameera.