Itiyoophiyaan biyya invastimantiif, daldalaa fi nageenya naannoo mirkaneessuuf tarsiimoo mijattuu olaanaa qabdudha - Ambaasaaddaroota biyyoota adda addaa

Adoolessa 2/2018 (ENA): Itiyoophiyaan invastimantiif, daldalaa fi nageenya naannoo mirkaneessuuf biyya barbaachisummaa tarsiimoo ijoo qabdu ta’uu Ambaasaaddaroonni biyyoota adda addaa ibsaniiru.


Ambaasaaddaroonni kunneen tumsa biyyoota lamaanii Itiyoophiyaa waliin qaban cimsuuf fedhii qaban ibsaniiru.
Yaada ENA’f kennaniin, ambaasaaddaroonni kunneen, Itiyoophiyaan dinagdee ishee guddisuuf tattaaffii taasiftu, walitti hidhamiinsa geejjibaa cimaa waliin taasiftu, sadarkaa giddugala naannoo ishee cimseera.

Itiyoophiyaatti Ambaasaaddarri Romaaniyaa Juuliyaa Paataakii akka himanitti, Itiyoophiyaan qindoomina diinagdee dagaagsuu fi nageenyaa fi tasgabbii naannichaa eegsisuu keessatti gahee galateeffamuu qabu taphachaa jirti jedhani.
Itiyoophiyaan biyyoota Afrikaa saffisaan guddachaa jiran keessaa tokko ta’uu kan hubachiisan ambaasaaddarichi, Daldalli bilisaa fi qindoominni gabaa guddina dinagdee ardii kanaa saffisiisuuf barbaachisaa ta’uu dubbataniiru.

Teessoo Gamtaa Afrikaa kan taate Finfinnee fi gaheen seenaa isheen qabdu, Itiyoophiyaan dippilomaasii fi tattaaffii waloo qormaata Afrikaa furuuf biyya filatamaa taasisuu ishee ibsaniiru.
Itiyoophiyaatti hogganaan ergamaa Omaan Afkaar Al Faarsii akka himanitti, Itiyoophiyaan teessuma lafaa bal’aa fi diinagdeen guddachaa jiru irraa kan ka’e naannicha keessatti biyya furtuu taate dha jedhani.

Hogganaan Ergamaa kun akka jedhanitti, naannicha walitti hidhuu keessatti gaheen ardii guddachaa jira; daandiin qilleensaa guddicha Afrikaa, Daandiin Qilleensaa Itiyoophiyaa, naannoo walitti hidhuu fi ardiilee keessatti gumaacha guddaa qaba.
Hariiroon biyyoota lamaanii Itiyoophiyaa fi Omaan gama daldalaa fi invastimantiin guddachaa akka jiru eeruun, Omaan oomisha sibiilaa fi paaletii pilaastikii gara Itiyoophiyaatti kan ergitu yoo ta’u, Itiyoophiyaan ammoo buna, saalaxaa fi oomishaalee qonnaa biroo gara Omaan akka ergitu ibsaniiru.

Daldala biyyoota lamaanii daran babal’isuuf carraan akka jiru kan hubachiisan yoo ta’u, Omaan hariiroo biyyoota lamaanii Itiyoophiyaa waliin qabdu gama adda addaatiin gabbisuuf fedhii akka qabdu hubachiisaniiru.

Itiyoophiyaa keessatti pirojektoota riil isteetii(ijaarsa manneenii) fi bu’uuraalee misoomaa, dameewwan oomishaa, ijaarsaa fi qonnaa invastaroota Omaan itti bobba’uu danda’an irratti carraan invastimantii bal’aan akka jiru hubachiisaniiru.

#Ena Afaan Oromoo #TOI #Ena