Manni Maree Bakka Bu’oota Ummataa haaraa hundaa’u imala badhaadhina jijjiirama biyyaalessaatiin uumame itti fufsiisuuf imaanaan uummataa irra jira

Waxabajjii 23/2018 (ENA): Bu’aa filannoo waliigalaa torbaffaa bu’uura godhachuun kan ijaaramu Manni Maree Bakka Bu’oota Ummataa imala badhaadhina jijjiirama biyyaalessaa Itiyoophiyaa itti fufsiisuuf imaanaa ummataa akka qaban dura taa’oonni koree dhaabbii Mana Maree Bakka Bu’oota Ummataa ibsaniiru.

Miseensonni Mana Maree Bakka Bu’oota Ummataa waggaa shan shaniin ummataan kan filataman sirna filannoo waliigalaa, bilisaa, kallattii, haqa qabeessaa fi iccitii ta’een akka ta’e Heera mootummaa FDRE keewwata 54 irratti ifatti ibsameera.

Filannoo waliigalaa Itiyoophiyaa Caamsaa 24, 2018 gaggeeffame hordofuun, injifataan Paartii Badhaadhinaa baatii Fulbaana dhufu keessa mootummaa haaraa ni hundeessa jedhamee eegama.

Akka Dura Taa'aan Koree Dhaabbii Karoora, Baajata fi Faayinaansii Mana Maree Dassaalenyi Wadajoo himanitti, filannoo waliigalaa torbaffaan fedhii cimaa lammiileen misooma, nagaa fi bulchiinsa gaariif qaban mirkaneessee jira jedhan.
Bu’aa filannoo waliigalaa bu’uura godhachuun kan ijaaramu Manni Maree Bakka Bu’oota Ummataa imala badhaadhinaa jijjiiramni biyyaalessaa Itiyoophiyaa uumte itti fufsiisuuf imaanaa ummataa qaba jedhaniiru.

Itti aanaan dura taa’aa koree dhaabbii dhimma fayyaa, misooma hawaasummaa, aadaa fi ispoortii mana marichaa Doktar Taaddalee Buraakaa akka ibsanitti, Itiyoophiyaatti piroojektoonni misooma biyyaalessaa hedduun ijaaramaa akka jiran himaniiru.
Badhaadhina waliigalaa Itiyoophiyaa mirkaneessuuf hojii hordoffii fi to’annoo cimaa akka raawwatu manni maree haaraa kana ummanni imaanaa itti kenname ta’uus ibsaniiru.

Itti aanaan dura taa’aa koree dhaabbii seeraa fi haqaa mana maree kanaa kan biraan obbo Isaa Boruu, paartiileen siyaasaa filannoo booda dorgommii gara tumsaatti jijjiiruun dimokiraasii cimaa fi mootummaa ta’e ijaaruuf hojjechuu akka qaban ibsaniiru.

Hawaasni mootummaa cimsuu akka qabu eeruun, akkasumas mootummaan waadaa ummataaf gale raawwachuun piroojektoota misoomaa misoomaaf bu’a qabeessa ta’an ijaaruu qaba jedhani.
Badhaadhinaa fi guddina Itiyoophiyaa mirkaneessuu fi kaayyoo misooma biyyaalessaa galmaan gahuuf qaamoleen hundi gahee isaa bahuu akka qabus ibsaniiru.

Manni marichaa itti gaafatamummaa seerota galma misoomaa galmaan gahuu danda’an baasuu fi Itiyoophiyaa mallattoo badhaadhina taasisuu danda’u baafachuu qaba jedhaniiru.

Misooma koridarii dabalatee pirojektoonni misoomaa adda addaa milkaa’inaan raawwatamaa akka jiran hubachiisuun, hawaasni beekumsa, anniisaa fi dandeettii qabuun mootummaa waliin hiriiruun guddina Itiyoophiyaa saffisiisuu keessatti gahee isaa bahachuutu irraa eegama jedhan.

#ENA_Afaan Oromoo #ENA