Itiyoophiyaan Konkolaattota Elektriikaa babal’isuudhaan guddina dinagdee magariisaa fakkeenya kan ta’u galmeessisaa jirti

Waxabajjii 15/2018 (ENA) - Itiyoophiyaan konkolaattota elektriikaa babal’isuun fayyadama humna haaromfamuu fi guddina Dinagdee mijaawaatiif milkaa’ina fakkeenya ta’u galmeessisaa jiraachuu ishee De’eetaan Ministiraa Geejibaa fi Loojistiiksii Bari’oo Hasan ibsan.

Itiyoophiyaan teeknooloojiiwwan geejibaa, industirii, teekinooloojiiwwan anniisaa qusatanii fi konkolaattota elektriikaa guddina dinagdee saffisiisan irratti xiyyeeffannoodhaan hojjachaa jirti.

Kanaanis baasii boba’aadhaaf qisaasamu waggaa waggaan xiqqeessuu fi sirna Geejibaa Annisaa haaromfamuun dursamu haala olaanaadhan ijaaraa jirti.

Ministeerri Geejibaa fi Loojistiiksii dhaabbilee Federaalaa 18 ol kan hirmaachise tarsiimoo haaraa konkolaattota elektriikaa (2025-2030) fi karoora hojiirra oolmaa isaa ifa gochuun isaa ni yaadatama.

De’eetaa Ministiraa Geejibaa fi Loojistiiksii Bari’oo Hasan ENA’f akka ibsanitti; tarsiimichi adeemsa sektara Geejiba biyyattii gara Anniisaa elektriikaatti jijjiiru, haala saffisaan gara hojiitti galchuu fi qindoomina dhaabbilee cimsuuf yaadamee kan qophaa’edha.

Itiyoophiyaan baasii boba’aa xiqqeessuu fi dhiyeessii konkolaattota elektriikaa babal’isuuf tarsiimoowwan adda addaa bocuu fi imaammatoota onnachiiftuu taaksii baasuu irratti hojii guddaa hojjachaa jirti jedhan.

Mootummaan sekterichaaf xiyyeeffannoo olaanaa kennuun isaa konkolaattota elektriikaa irratti onnachiiftuuwwan adda addaa akka taasifaman eeraniiru.

Haaluma kanaan, konkolaattonni elektriikaa guutummaatti suphamanii gara biyyaa galan irratti taaksiin gumuruukaaf kaffalamu inni olaanaan hanga dhibbantaa 35 akka ta’u gochuu isaanii ibsaniiru.

Qaraxni kun walumaa gala taaksii eksaayizii,Suur fi taaksii dabalataa kan ofkeessatti qabatu waan ta’eef fichisiiftota guddaa kan onnachiise ta’uu eeraniiru.

Dabalataanis konkolaattonnib biyya keessatti suphaman qaraxa gumuruukaarraa bilisaa taasifamuusaanii eeraniiru.

Karoorri elektirifikeeshinii biyyattii yeroo ammaa otomoobiloota manaa fi geejjiba ummataa qofaan osoo hin daangeffamiin, geejjiba daangaa cehuu fi konkolaattonni fe’isa gurguddoo akka hammatu godhamuu ibsaniiru.

Haala Kanaan konkolaattota fe’isaa gurguddoo amma toonii 20 ulfaatan biyya keessatti suphuun eegalamuu eeranii, pirojektoota gurguddoorrattis maashinaroonni elektiriikiin hojjetan hojii eegaluusaanii dabalanii ibsaniiru.

Baay’inni konkolaattota elektiriikii biyyattii kuma 145 ol ta’uu dubbatanii, yeroo ammaa magaalota sagal keessatti tajaajilli otobisii elektiriikii eegalamuu beeksisaniiru.

Magaalonni misooma kooriidaraa ijaaran buufata konkolaataan elektiriikii chaarjii itti guuttatu ijaaraa jiraachuu himanii, waggoota 10 dhufan magaalaa Finfinneetti buufattoonni konkolaataa elektiriikii hatattamaan chaarji godhan kuma 1 fi 176 dhaabuuf karoorfamuu eeraniiru.

Kana gochuufis tajaajila elektiriikii Itiyoophiyaa, Itiyoo-telekoomii fi qooda fudhattoota biro waliin qindaa’uun qajeelfamni biyyaalessaa haaraan qophaa’uusaa ibsaniiru.

Bu’ura misoomaa diriirsuun cinaatti suphaa baatirii, irra deebi’uun itti gargaaramuu fi oomisha baatiriirratti konkolaattota elektiriikii xiyyeeffachuun teeknooloojii fi dhaabbilee qorannoo waliin hojiin qorannoo saayinsaawaa waloo hojjetamaa jiraachuu ibsaniiru.

Sosochiin konkolaattota elektiriikii maxxantummaa boba’aa biyyattii hir’isuun,birmadummaa dinagdee Itiyoophiyaa mirkaneessuu fi sadarkaa jireenyaa ummataa fulla’insaan fooyyessuuf humna guddaa kan ta’udha.