Qorannoo dhaabbilee barnoota olʼaanoo keessatti gaggeeffaman buʼa-qabeessaa fi sirna hojii walfakkaataa akka qabaatan gochuun, milkaaʼina karoora misooma biyyaatiif gahee isaanii akka bahan ni jajjabeeffamu - Ministeera Barnootaa.

Waxabajjii 1/2018(ENA)-Hojiiwwan qorannoo dhaabbilee barnoota olʼaanoo keessatti gaggeeffaman buʼa-qabeessaafi sirna hojii walfakkaataa akka qabaatan gochuun, milkaaʼina karoora misooma biyyaatiif gahee isaanii akka bahan ni jajjabeeffamu jedhe Ministeerri Barnootaa.

​Yunivarsiitiin Madda Walaabuu qorattootaafi barsiisotaaf leenjii ijaarsa dandeettii tarsiimoo fooyyaʼiinsa qorannoo ammayyaafi dhimmoota kanaan walqaban irratti xiyyeeffate kennuu jalqabeera.



​Sirna jalqabsiisa leenjirratti kan argaman hoji raawwachiisaan dhimmoota qorannoofi tajaajila hawaasaa Ministeera Barnootaa Dr. Sarawiit Handisoo akka jedhanitti, yuunivarsiitiiwwan hojii baruu-barsiisuu cinaatti hojiiwwan qorannoo rakkoo hawaasaa hiikan irratti akka xiyyeeffatan taasifamaa jira.

​Icciitiin guddina biyya takkaa buʼaa hojii qorannoofi kalaqa qulqullina qabu geeggessuu taʼuu ibsuun keessattuu; yuunivarsiitiiwwan hojii baruu-barsiisuu cinaatti hojiiwwan qorannoo rakkoo hiikan gaggeessuun naannoo isaanii bira dabranii milkaaʼina galma misooma biyyaatiif gahee isaanii bahuuf sochoʼuu akka qaban ibsaniiru.

​Yunivarsitichi leenjii qulqullina qabu kennuu cinaatti hojiiwwan qorannoo rakkoo hawaasaa hiikan gaggeessuun misooma biyyaalessaa jalqabame deeggaruuf hojjechaa akka jiru kan ibsan ammoo Pireezidantii Yuunivarsiitichaa Dr. Birhaanamaasqal Xanaadha.



​Yuunivarsiitichi bara baajataa kanatti qorannoowwan hojii qonnaa, kunuunsaafi eegumsa qabeenya uumamaa, fayyaa, tuuriizimiifi dameelee xiyyeeffannoo biroo irratti xiyyeeffatan gaggeessaa akka jiru dubbataniiru.


​Yuunivarsiitichi kanaan dura hojiiwwan qorannoo dhuunfaan hojjetamaa turan qindeessuun, hojiiwwan pirojektiifi qorannoo gurguddoo fooyyaʼaafi dhiibbaa uumuu dandaʼaniif xiyyeeffannaa kennuus akeekan.

​Leenjiin ijaarsa dandeettii yuunivarsiitichi yeroo ammaa kennaa jiru kunis, qorannoowwan dhaabbaticha keessatti gaggeeffaman rakkoo hawaasaa jiddugaleessa kan godhate, buʼa-qabeessaafi sirna hojii walfakkaataa akka qabaatan kan godhudhas jedhaniiru.



​Leenjiin akkasii bajata qusannoon fayyadamuun buʼaalee qorannoo dorgomaafi dhiibbaa uumuu dandaʼan dhiyeessuun dandeettii humna namaa guddisuuf gahee guddaa akka uumu kan ibsan immoo Itti-aanaa Pireezidantii Dhimmoota Akkaadaamii fi Qorannoo Yuunivarsiitichaa Dr. Bazzabbih Wandimmuuti.

​Leenjichi sirna qorannoo buʼuraa, naamusa qorannoo, 'Artificial Intelligence',fi mala fandii (maallaqa) barbaaduu irratti kan xiyyeeffate taʼuun ibsameera.

​Hayyoonni leenjicharratti hirmaatan gama isaaniitiin, leenjiin sirna qorannoo ammayyaa irratti xiyyeeffate kun buʼaa qorannoo dhiibbaa uumuu dandaʼaniifi fooyyaʼoo taʼan qopheessuuf carraafi humna guddaa akka uumuuf eeraniiru.