Naannoo Oromiyaatti lafa hektaara miiliyoona 2tuqaa7 irratti  hojiin misooma sululaa raawwatameera 

Caamsaa10/2018(ENA)- Naannoo Oromiyaatti waktii Bonaa  bara kanaan  Lafa hektaara  Miiliyoona 2tuqaa 7 irratti hojiin misooma  suluulaa  hojjetamuusaa Biiroon Qonna Naannichaa beeksiseera.

Biirichatti Daarektarri Misooma Bosonaa fi Kunuunsa Qabeenya Uumamaa, Obbo Katamaa Abdiisaa, ENA’f  akka ibsanitti,   naannichatti hojiiwwan misooma sululaa waggoottan darban raawwatamaniin lafti duwwaatti hafee ture deebi'ee dandamateera.

Kanaanis  omishaa fi omishtummaa qonnaa guddisuurrattis  bu'aan jajjabeessaan akka galmaa'es dubbataniiru.

Muuxannoo kanaan dura argame kana caalaatti cimsuun,  bona bara kanaa lafa heektara miiliyoona 2tuqaa7 irratti hojiin misoomaa kun gaggeeffamuu isaa dubbataniiru. 

Hojii misooma suluulaa  kanaan, lafa waliinii fi ooyruu  dhuunfaa irratti hojiin daagaa fi ittisaa dabalatee, hojiiwwan eegumsa biyyoo fi bishaanii adda addaa hojjatamuu isaanii eeraniiru.

Naannoowwan hojiin misooma suluulaa kun irratti hojjatame  kanattis, ganna dhufutti hojii dhaabbii biqiltuu  gaggeessuuf boolla qotuu fi qophiiwwan biroon hojjetamaa jiraachuu  ibsaniiru.

Naannichatti hojii misooma sululaa  kanaan dura hojjatameen, dhiqama biyyee fi saaxilamummaa lolaa hir'isuun gabbina biyyee waan dabaleef,omishnii fi omishtummaan qonnaa akka guddatu gochuu  danda’uusaa eeraniiru.

Naannoowwan manca'anii turan deebi'anii misoomuusaaniin,rooba misooma midhaaniitiif mijataa ta’e akka jiraatu dandeessisuusaa ibsaniiru.

Haalli qilleensaa fi jiidhinsi mijataan akka uumamu gochuu isaa eeranii, qabeenyi bishaan lafa irraa fi lafa jalaa waan dabaleef, misoomni jallisiis bal'inaan akka gaggeeffamu haalli mijataan uumamuusaa himaniiru.

sululoota deebanii misooman kanarratti, nyaata loonii fi misooma fuduraalee fi muduraalee,akkasumas hojii misooma dammaa gaggeessuun,carraa hojii uumuuf shoora olaanaa taphachuu isaa eeraniiru.

Laggeenii fi haroowwan gogani  deebi'anii  bishaan dhugaatii namaa fi loonii, akkasumas horsiisa qurxummii fi tajaajila biroof akka oolan gochuu keessatti gumaacha guddaa taasisuusaa beeksisaniiru.