Godina Wallagga  Bahaatti misooma Ruuzii  babal’isuuf hojii hojjatameen bu’aan argamaa jira

Caamsaa 9/2018 (ENA)- Naannoo Oromiyaa   Godina Wallagga Bahaatti  misooma Ruuzii babal’isuuf  hojii hojjatameen bu’aan argamaa jiraachuu Waajjirri Qonnaa Godinichaa ibse.

Dursaan Garee Misoomi Midhaanii  Waajjira Qonnaa Godina Wallagga Bahaa Obbo Birhaanuu Dhiinsaa  ENA’f  akka ibsanitti, godinichaa keessatti  misoomni  Ruuzii   bifa inisheetiviitiin hojiirra oolaa jira.

Waggoottan darban keessa  Oomishaa Ruuzii babal’isuu fi omishtummaa isaa dabaluuf hojiiwwan hojjatamaniin bu’aan abdachiisaan argameera jedhaniiru.

Qonnaan bulaan godinichaas omishni Ruuzii bu’aa qabeessa ta’uu isaa hubachuusaaniin bara qabame Kanaan  misoomni  kun bal’inaan  hojjatamaa akka jiru beeksisaniiru.

Waggaa darbe godinichatti lafa hektaara kuma 174  ol irratti Ruuzii misoomsuun, omishni kuntaalli  miiliyoona 4 ol akka argame ibsaniiru.

Bara kanas lafti hektaara  kuma 180  ol ta’u misooma ruuziitiif   qophaa’aa jiraachuu kan eeran yommuu ta’u, omishtummaa dabaluuf qonnaan bulaan bifa kilaastaraatiin akka omishan  ni taasifama jedhaniiru.

Godinichatti Ruuzii  bal’inaan omishuu keessatti aanaaleen akka Saasiggaa, Waamaa Haagaloo, Nuunuu Qumbaa fi Guutoo Giddaa isaan dursa eeramani dha.

Dursaan Garee Misoomi Midhaanii Waajjira Qonnaa Aanaa Saasiggaa Obbo Waggaarii Tamasgeen akka ibsanitti, aanichatti omishni Ruuzii omishamuu erga jalqabee waggaa sadii kan lakkoofsise yommuu ta’u, waggaa waggaan jijjiiramni abdachiisaan argamaa jira.

Waggaa darbe lafa hektaara kuma 13 irratti Ruuzii  misoomsuun, oomishni kuntaalli  kuma 298 argamuusaa ibsuun, bara kana immoo lafa hektaara kuma 17 misoomsuun, omishni kuntaalli  kuma 437 ni eegama jedhaniiru.

Qonnaan bulaan aanichaa Muddiin Sa'iid akka jedhutti, kanaan dura naannoo sanatti muuxannoon Ruuzii  omishuu waan hin jirreef  gara hojichaatti seenuuf sodaa qabaachuu isaanii  ibsaniiru.

Haata’u malee, gama mootummaatiin deeggarsa taasifameefii fi gorsa ogeeyyiitiin, amma irratti hojichaan bu’aa qabeessa ta’uu jalqabuusaanii  ibsaniiru.