Ijaarsi Warshaa xaa’oo Yuriyaa haala  Karoora qabameen  Adeemaa  jira – Ministira Mummee  Doktar Abiyyi  Ahimad  

Caamsaa 9/2018 (ENA)- Warshaan xaa’oo Yuuriyaa waggaatti meetirik toonii miiliyoona 3 oomishuu danda'uu fi Godeetti ijaaramaa jiru, haala  karoorfameen  hojjetamaa jiraachuu Ministirri Mummee  doktar  Abiyyi  Ahimad  beeksisan.

Ministirri  muummee doktar  Abiyyi  Ahimad  Aliikoo Daangotee waliin ta'uun sadarkaa hojichi irra jiru gamaggamuuf har'a iddoo pirojektichaa Godeetti argamuun daawwataniiru.

 

Saffisni hojii guutuu naannoo pirojektichaa irratti mul'atu kan nama jajjabeessu ta'uu isaas fuula miidiyaa hawaasummaa isaaniin  ibsaniiru.

Ijaarsa pirojektii biyyaalessaa guddaa fi baay'ee barbaachisaa ta'e kana galmaan gahuuf kutannoo fi tumsa jiru haala  calaqqisiisuun kutaalee pirojektichaa adda addaan keessa  ijaarsonni jiran  haala  karoora keenyaatiin  deemaa jira jedhaniiru.

Bara darbe baati Hagayyaa keessa Dangotee Giruuppii  waliin ta'uun warshaa waggatti metrik toonii miiliyoona 3 oomishuu danda'u ijaaruuf waliigaltee guddaa abbootii qabeenyaa waliin taasifnee turres jedhaniiru.

Bara kanatti ammoo baatii Onkololeessaa keessa ijaarsa pirojektichaa ifatti jalqabuu kan ibsan Ministirri Mummee, hojiin kun ijaarsa bu'uraalee misoomaa ol ta'uu isaa hubachiisaniiru.

Investimantichi ce’umsa Qonnaa Itiyoophiyaa, birmadummaa nyaataa, guddina induustirii fi dinagdeedhaan of danda'uuf tattaaffii  taasifamu keessatti faayidaa tarsiimowaa  kan qabu ta'uu ibsaniiru.

 

Warshaan xaa’oo kun yeroo xumuramu dandeettii oomishuu biyya keessaa kan cimsu, hirkattummaa xaa’oo alaa galurratti hundaa'u kan hir'isu fi qonnaan bultoota keenya miiliyoonaan lakkaa'aman deeggara  jedhaniiru.